கோவை அரசு மருத்துவமனையின் முதல்வரை கண்டித்து போஸ்டர் ஒட்டிய விடுதலைச் சிறுத்தைகள் கட்சி நிர்வாகி மீது வழக்குப் பதிவு

கோவை : கோவை அரசு மருத்துவக் கல்லூரி மருத்துவமனையின் முதல்வர் அசோகனை கண்டித்து போஸ்டர்கள் ஒட்டிய விடுதலை சிறுத்தை கட்சி நிர்வாகி மீது போலீசார் வழக்கு பதிவு செய்யப்பட்டது.



நேற்று முன்தினம் விடுதலைச் சிறுத்தைகள் கட்சியின் தெற்கு சட்டமன்ற தொகுதி சார்பாக கோவை அரசு மருத்துவமனையின் முதல்வரை கண்டித்து போஸ்டர்கள் ஒட்டப்பட்டது. மேலும், இந்த போஸ்டரில் தமிழக அரசின் சுகாதாரத் துறையே மருத்துவமனை முதல்வர் மீது துறை ரீதியான நடவடிக்கை எடு என்ற வாசகம் குறிப்பிடப்பட்டிருந்தது. அதேபோல, மருத்துவக் கல்லூரியில் உணவு விடுதியில் நடக்கும் ஊழல்கள் மீது நீதி விசாரணை நடத்து எனவும், மருத்துவமனையின் முதல்வர் ஊழியர்களிடம் சாதி ஆணவத்தோடு நடப்பதாகவும் குறிப்பிட்டிருந்தனர். 



இந்த நிலையில், போஸ்டர்கள் ஒட்டிக் கொண்டிருந்த பொழுது ரோந்து பணியில் வந்த போலீசார், அனுமதி இன்றி ஒட்டியதாக போஸ்டர்களை பறிமுதல் செய்தும், விடுதலை சிறுத்தை கட்சி நிர்வாகிகளையும், பந்தய சாலை காவல் நிலையத்திற்கு அழைத்துச் சென்றனர். இந்த நிலையில், கட்சியின் தெற்கு சட்ட மன்ற நிர்வாகி பாலசிங்கத்தின் மீது போலீசார் அனுமதியின்றி போஸ்டர் ஒட்டியதாக போலிசார் வழக்குப்பதிவு செய்துள்ளனர்.