குன்னூரில் ரூ. 11.89 கோடிக்கு ஏலம் போன தேயிலைத்தூள் : விலை வீழ்ச்சியால் விவசாயிகள் அதிருப்தி

நீலகிரி : குன்னூர் தேயிலை ஏல மையத்தில் ரூ. 11 கோடியே 89 லட்சத்துக்கு தேயிலைத்தூள் ஏலம் போனது.

குன்னூர் தேயிலை வர்த்தகர் அமைப்பு சார்பில் ஆன்லைன் மூலம் தேயிலை ஏலம் நடைபெற்றது. இந்த ஏலத்தில் உள்நாட்டு மற்றும் வெளிநாட்டு வர்த்தகர்கள் கலந்து கொண்டு தேயிலை தூளை ஏலம் எடுக்கின்றனர். இந்த ஏலத்தில் மொத்தம் 19 லட்சத்து 4 ஆயிரம் கிலோ தேயிலை தூள் விற்பனைக்கு வந்தது. இதில், 12 லட்சத்து 20 ஆயிரம் கிலோ இலை ரகமாகவும், 6 லட்சத்து 84 ஆயிரம் கிலோ டஸ்ட் ரகமாகவும் இருந்தது. இந்த ஏலத்தில் 73 சதவீத தேயிலை தூள் விற்பனையானது. இதன் அளவு 13 லட்சத்து 62 ஆயிரம் கிலோ ஆகும். இதன் ரொக்க மதிப்பு 11 கோடியே 89 லட்சம் ரூபாய் ஆகும்.

ஏலத்தில் விற்பனையான அனைத்து தேயிலை தூள் ரகங்களுக்கும் ரூ. 5 வரை விலை வீழ்ச்சி ஏற்பட்டது. உயர்ந்தபட்ச விலையாக சி.டி.சி. ரக தேயிலை தூள் கிலோ ஒன்றுக்கு ரூ. 261 என்ற விலையிலும், ஆர்தோடக்ஸ் தேயிலை தூள் கிலோ ஒன்றுக்கு ரூ. 235 என்ற விலையிலும் ஏலம் போனது.



சராசரி விலையாக இலை ரகத்தின் சாதாரண வகை கிலோ ஒன்றுக்கு 73 ரூபாயிலிருந்து 78 ரூபாய் வரையிலும், விலை உயர்ந்த தேயிலை தூள் கிலோ ஒன்றுக்கு 107 ரூபாயிலிருந்து 120 ரூபாய் வரையிலும் ஏலம் சென்றது. டஸ்ட் ரகத்தின் சாதாரண வகை கிலோ ஒன்று 72 ரூபாயிலிருந்து 77 ரூபாய் வரையிலும், விலை உயர்ந்த தேயிலை தூள் கிலோ ஒன்றுக்கு 108 ரூபாயிலிருந்து 118 ரூபாய் வரையிலும் ஏலம் சென்றது.



விற்பனை எண் 27-க்கான ஏலம் எதிர்வரும் 4,5 ஆகிய தேதிகளில் நடக்கிறது. ஏலத்திற்கு மொத்தம் 21 லட்சத்து 95 ஆயிரம் கிலோ தேயிலை தூள் விற்பனைக்கு உள்ளதாக தேயிலை வர்த்தக கூட்டமைப்பு தெரிவித்துள்ளது.