கோடை சீசனை முன்னிட்டு உதகையில் புகைப்பட கண்காட்சி இன்று தொடக்கம்

நீலகிரி : நீலகிரி மாவட்டத்தில் கோடை சீசன் தொடங்கியுள்ள நிலையில், இதன் ஒரு பகுதியாக உதகையில் புகைப்பட கண்காட்சி இன்று தொடங்கியது.



 

ஒவ்வொரு ஆண்டும் நீலகிரி மாவட்டத்தில் கோடை விழா மாவட்ட நிர்வாகம் மற்றும் சுற்றுலாத்துறை சார்பாக சிறப்பாக நடைபெற்று வருகிறது. இதில், சுற்றுலாப் பயணிகள் கண்டு ரசிக்கும் வகையில், பல்வேறு சுற்றுலாத் தலங்களில் பொழுதுபோக்கு நிகழ்ச்சிகள் என நடத்தப்படுவது வழக்கம். 



இதில், அரசு தோட்டக்கலை மையத்தில் ஆண்டுதோறும் நடைபெறும் புகைப்படக் கண்காட்சி இன்று தொடங்கப்பட்டது. 



இந்தப் புகைப்பட கண்காட்சியில் பறவைகள், வன உயிரினங்கள், பல்லுயிர் புகைப்படங்கள் என அனைத்தும் இக்கண்காட்சியில் வைக்கப்பட்டுள்ளன. ஒவ்வொரு புகைப்படமும் கலைநயத்துடன் மட்டுமல்லாமல் உயிரோட்டமாய் புகைப்படக் கலைஞர்கள் எடுத்திருப்பது பார்ப்பவர்களை வெகுவாக கவர்ந்தது. 



மேலும், இதில் நீலகிரி மாவட்டத்தில் வசிக்கும் பழங்குடியின மக்களின் வாழ்க்கை முறையை குறிக்கும் புகைப்படங்களும் இடம் பெற்றிருந்ததை சுற்றுலாப் பயணிகள் ஆர்வமுடன் கண்டு ரசித்தனர். ஒரு மாதம் நடைபெறும் இந்த புகைப்பட கண்காட்சியை ஏராளமான சுற்றுலாப் பயணிகள் கண்டு ரசிப்பார்கள் என எதிர்பார்க்கப்படுகிறது.