எதிர்கட்சிகள் ஆளும்கட்சிக்கும், பொதுமக்களுக்கும் எதிரிகட்சியாக செயல்படுகிறது : கோவையில் ஜி.கே. வாசன் குற்றம்சாட்டு

கோவை : எதிர்கட்சிகள் ஆளும்கட்சிக்கும், பொதுமக்களுக்கும் எதிரிகட்சியாக செயல்படுவதாக சூலூரில் அ.தி.மு.க. வேட்பாளருக்கு ஆதரவாக பிரச்சாரம் மேற்கொண்ட தமிழ் மாநில காங்கிரஸ் கட்சியின் தலைவர் ஜி.கே. வாசன் குற்றம்சாட்டினார். 

சின்னியம்பாளையம் பகுதியில் தமிழ் மாநில காங்கிரஸ் கட்சியின் தலைவர் ஜி.கே. வாசன், சூலூர் தொகுதி அ.தி.மு.க. வேட்பாளர் கந்தசாமியை ஆதரித்து பரப்புரை மேற்கொண்டார். அப்போது அவர் பேசியதாவது :- நடைபெறக்கூடிய இடைத்தேர்தல் முக்கியமான தேர்தல் என்பதை உணர்ந்து நன்மை செய்பவர்களுக்கு மக்கள் வாக்களிக்க வேண்டும். அ.தி.மு.க. ஆட்சியில் அடிமட்ட மக்களுக்கு திட்டங்கள் முழுமையாக சேர்ந்துள்ளது. மக்கள் விரும்பும் ஆட்சியாளர்களாக அ.தி.மு.க.,வினர் உள்ளனர். பல்வேறு தரப்பினருக்காக உழைக்கும் அணியாக அ.தி.மு..க. அணி செயல்படுகிறது. அ.தி.மு.க. கூட்டணி மக்கள் கூட்டணி, வெற்றி கூட்டணி. இது வேஷம் போட்டு கோஷம் போடும் கூட்டணியல்ல. மத்திய, மாநில அரசுகளின் ஒத்த கருத்து, வளர்ச்சிக்கு அடித்தளம். நிலுவையுள்ள திட்டங்கள் நிறைவேற அ.தி.மு.க. கூட்டணிக்கு வாய்ப்பளிக்க வேண்டும்.

எதிர்கட்சிகள் ஆளும்கட்சிக்கும், பொதுமக்களுக்கும் எதிரிகட்சியாக செயல்படுகிறது. எதிரிகட்சியாக செயல்படுவது ஏற்புடையதல்ல. மக்களும் விரும்பவில்லை. மக்கள் திட்டங்களை எதிர்கட்சிகள் முடக்குகின்றன. எதிர்கட்சிகள் தோல்வி பயத்தில் உள்ளன. மக்கள் முன்னேற்றத்திற்கு, வளர்ச்சிக்காக தமிழ்நாடு அரசு செயல்படுகிறது. அமைச்சர் எஸ்.பி. வேலுமணி கோவை மாவட்டத்தின் வளர்ச்சிக்காக பாடுபட்டு கொண்டிருக்கிறார். ஜி.எஸ்.டி. வரியால் பாதிக்கப்பட்ட விசைத்தறி, ஜவுளி தொழில் மேம்பட மத்திய பா.ஜ.க. அரசு, மீண்டும் பொறுப்பேற்றதும், வரியைக் குறைக்க நடவடிக்கை எடுக்கப்படும். வளமான, பலமான, வளர்ச்சியடைந்த தொகுதியாக சூலூர் மாற அ.தி.மு.க. வேட்பாளர் கந்தசாமிக்கு வாக்களிக்க வேண்டும், என தெரிவித்தார்.