தங்க மங்கை கோமதி மாரிமுத்துவிற்கு ரூ. 15 லட்சம் பரிசை அறிவித்தது அ.தி.மு.க.

ஆசிய தடகள சாம்பியன்ஷிப் போட்டியில் தங்கம் வென்ற கோமதி மாரிமுத்துவுக்கு அதிமுக சார்பில் ரூ.15 லட்சம் பரிசு அறிவிக்கப்பட்டுள்ளது. 

கத்தார் தலைநகர் தோஹாவில் நடைபெற்ற ஆசிய தடகளப்போட்டியில் பெண்களுக்கான 800 மீட்டர் ஓட்டப் பந்தயப்போட்டியில் திருச்சி மாவட்டத்தைச் சேர்ந்த கோமதி மாரிமுத்து தங்கம் வென்று சாதனை படைத்தார். அவருக்கு தி.மு.க. சார்பில் ரூ. 10 லட்சமும், மு.க.ஸ்டாலின் வழங்கினார். காங்கிரஸ் சார்பில் ரூ. 5 லட்சமும் ஏற்கனவே அறிவிக்கப்பட்டு விட்டது. 

இந்த நிலையில், அ.தி.மு.க. கழக ஒருங்கிணைப்பாளர் ஓ. பன்னீர் செல்வம் மற்றும் இணை ஒருங்கிணைப்பாளர் எடப்பாடி பழனிசாமி ஆகியோர் வெளியிட்டுள்ள அறிக்கையில் கூறியுள்ளதாவது:- மறைந்த தமிழக முதலமைச்சர் ஜெயலலிதா விளையாட்டு வீரர்களுக்கும், வீராங்கனைகளுக்கும் பல்வேறு வகைகளில் உதவிகளைச் செய்து, அவர்கள் உற்சாகத்துடன் போட்டிகளில் கலந்துகொண்டு பல்வேறு பதக்கங்களைப்பெற்று தமிழ்நாட்டிற்கு பெருமை சேர்த்திட வழிவகை செய்து தந்துள்ளார். 

அந்த வகையில், விளையாட்டு வீரர்களை ஊக்குவிக்கும் விதமாக அதிமுக சார்பில் தடகளப்போட்டியில் தங்கப் பதக்கம் வென்று கோமதி மாரிமுத்துக்கு ரூ.15 லட்சமும், வெள்ளிப்பதக்கம் வென்றுள்ள ஆரோக்கிய ராஜீவுக்கு ரூ. 10 லட்சம் வழங்கப்படும். மேலும், இவர்களின் சாதனைகள் மென்மேலும் தொடர வாழ்த்துகிறோம், இவ்வாறு தெரிவிக்கப்பட்டுள்ளது.