கோவை : கோவையிலிருந்து திருச்சி நோக்கி சென்று கொண்டிருந்த அரசு பேருந்தை மதுபோதையில் ஓட்டுநர் இயக்கியதால், பேருந்தை சிறைபிடித்து ஓட்டுநரிடம் பயணிகள் வாக்குவாதத்தில் ஈடுபட்டனர்.
கோவை : கோவையிலிருந்து திருச்சி நோக்கி சென்று கொண்டிருந்த அரசு பேருந்தை மதுபோதையில் ஓட்டுநர் இயக்கியதால், பேருந்தை சிறைபிடித்து ஓட்டுநரிடம் பயணிகள் வாக்குவாதத்தில் ஈடுபட்டனர்.
அரசு மற்றும் தனியார் பேருந்துகளின் ஓட்டுனர்கள் இரவு நேரங்களில் மது போதையில் வாகனங்களை இயக்கி வருவதாக தொடர்ச்சியாக புகார்கள் இருந்து வந்தது. அதேபோல, வட்டாரப் போக்குவரத்து துறை அதிகாரிகளும், தமிழ்நாடு அரசு போக்குவரத்து கழக அதிகாரிகளும் பேருந்து ஓட்டுனர்களின் செயல்பாடுகளை கண்காணிக்காததால் சில ஓட்டுநர்கள் மதுபோதையில் அதி வேகமாக வாகனங்களை ஓட்டி விபத்துக்குள்ளாகி வருகின்றனர்.
இந்த நிலையில் நேற்று இரவு TN39 N 0012 என்ற எண் கொண்ட தமிழ்நாடு அரசு போக்குவரத்துக் கழகத்திற்கு சொந்தமான கோவை - திருச்சி செல்லக்கூடிய பேருந்தானது, கோவை அரசு மருத்துவமனை நிறுத்தம் அருகே இருந்து ஒண்டிப்புதூர் வரை தாறுமாறாக ஓடியது.
இப்படி சென்ற பேருந்தானது பல்வேறு பகுதிகளில் விபத்தை ஏற்படுத்தும் வகையிலும் தரிகெட்டு ஓடியது. இதைதொடர்ந்து, சுமார் 8.30 மணி அளவில் இந்த பேருந்தானது, ஒண்டிப்புதூர் மேம்பாலம் அருகே திடீரென உரசியது. இதை சுதாரித்துக் கொண்ட முன் இருக்கையில் அமர்ந்திருந்த பெண் பயணி, சந்தேகத்தின் அடிப்படையில் சக பயணிகளிடம் ஓட்டுநர் மது போதையில் இருப்பதாக தெரிவித்தார். இதையடுத்து, ஒன்று சேர்ந்த சகபயணிகள் ஓட்டுநர் மது போதையில் இருப்பதை உறுதிப்படுத்தி பேருந்தை ஒண்டிப்புதூர் - இருகூர் பிரிவு அருகே நிறுத்தி வாக்குவாதத்தில் ஈடுபட்டனர். மேலும், பேருந்து ஓட்டுனர் தள்ளாடியபடி இருந்த சம்பவம் பேருந்தில் பயணித்த பயணிகளை கோபத்தில் ஆழ்த்தியது.
இதுகுறித்து பயணி ஒருவர் கூறியதாவது :- பல உயிர்களை பத்திரமாக அழைத்துச் செல்ல வேண்டிய ஓட்டுநர்கள் இப்படி மது போதையில் பல உயிர்களை பலி எடுக்கும் வகையில் செயல்படுவது கண்டிக்கத்தக்கது. நாங்கள் இன்று சுதாரித்துக்கொண்டு பேருந்தை நிறுத்தவில்லை என்றால், பிணமாகத்தான் போயிருப்போம். போக்குவரத்து கழகமும், வட்டாரப் போக்குவரத்து துறை அதிகாரிகளும் இரவு நேரங்களில் இதுபோன்று ஓட்டுநர்கள் மதுபோதையில் வாகனங்களை இயக்குகின்றனரா..? என கண்காணிக்க வேண்டும். ஆனால், அதிகாரிகள் அலட்சியமாக இருப்பதால், இது போன்ற செயல்பாடுகள் தொடர்ந்து வருகிறது. அதேபோல, மதுபோதையில் பேருந்தை இயக்கிய இந்த ஓட்டுனரை பணிநீக்கம் செய்தால் தான் மீண்டும் இதுபோன்ற சம்பவங்கள் நடைபெறாது, என ஆதங்கத்துடன் பேசினார்.
இதையடுத்து, தகவலறிந்து வந்த சிங்காநல்லூர் போலீசார், பேருந்து ஓட்டுனரை காவல் நிலையம் அழைத்து சென்று விசாரணை செய்தனர். அதில், இவர் திண்டுக்கல் மாவட்டத்தைச் சேர்ந்த சுப்பிரமணியம் என்பதும், இவர் காங்கேயம் போக்குவரத்து கழக எல்லைக்குட்பட்டவர் என்பதும் தெரியவந்தது. பின்னர், போலீசார் போக்குவரத்து கழக அதிகாரிகளுக்கு தகவல் தெரிவித்ததுடன், பேருந்து ஓட்டுனர் மீது மதுபோதையில் வாகனத்தை ஓட்டியதாக வழக்குப்பதிவு செய்தனர்.
கோவையில் மதுபோதையில் பேருந்தை ஓட்டிய ஓட்டுனரை பொதுமக்கள் சுதாரித்துக்கொண்டு பேருந்தை நிறுத்தியதால் பெரும் விபத்து தவிர்க்கப்பட்டது. மேலும், போக்குவரத்து கழகமும் வட்டாரப் போக்குவரத்து துறை அதிகாரிகளும் காவல் துறையும் இணைந்து இரவு நேரங்களில் பேருந்துகளை கண்காணித்து மதுபோதையில் இயக்குவதை தடுக்க உரிய நடவடிக்கை எடுக்க வேண்டும். இல்லையெனில், உயிர் இழப்புகள் ஏற்படும் என்பதே நிதர்சனம்.