வெப்பநிலை அதிகரிப்பால் தேனீர் விற்பனை குறைவு :தேயிலை ஏலத்திலும் விலை சரிவு

நீலகிரி : வெப்பநிலை அதிகரிப்பு காரணமாக தேனீர் விற்பனை குறைந்துள்ளதால், தேயிலை ஏலத்திலும் விலை குறைந்து காணப்படுவதாக தேயிலை வர்த்தகர்கள் தெரிவித்துள்ளனர். 

நீலகிரியின் பொருளாதாரத்தில் தேயிலைத்தூள் உற்பத்தி முக்கிய பங்கு வகிக்கிறது. தேயிலை விவசாயத்தை நம்பி 65 ஆயிரத்திற்கும் மேற்பட்ட விவசாயிகளும், தொழிலாளர்களும் உள்ளனர். இதுதவிர, 16 கூட்டுறவு தேயிலை தொழிற்சாலைகளும், 100-க்கும் மேற்பட்ட தனியார் தேயிலை தொழிற்சாலைகளும் இயங்கி வருகின்றன.



தொழிற்சாலைகளில் உற்பத்தி செய்யப்படும் தேயிலைத்தூள், குன்னூர் ஏல மையம் மூலம் விற்பனை செய்யப்படுகிறது. இங்கு தேயிலை வர்த்தகர் அமைப்பு சார்பில் ஆன்லைன் மூலம் ஏலம் நடத்தப்படுகிறது.

தற்போது, கோடைகாலம் என்பதால் குளிர்பானங்கள் விற்பனை அதிகரித்து, தேனீர் விற்பனை மற்றும் விலை குறைவது வழக்கம் என்பதால், தேயிலை ஏலத்தில் சி.டி.சி. தேயிலைத்தூளின் அதிகபட்ச விலை கிலோவுக்கு ரூ. 240-ம், ஆர்தோடக்ஸ் தேயிலைத்தூளின் அதிகபட்ச விலை கிலோவுக்கு ரூ.251 எனவும், சராசரி விலையாக இலை ரகம் சாதாரண வகை கிலோவுக்கு ரூ. 85 முதல் ரூ. 90 வரையும், உயர் வகை கிலோவுக்கு ரூ. 112 முதல் ரூ. 120 வரையும் விற்பனையாகிறது. 

கோடைகாலத்தில் குளிர்பானங்கள் விற்பனை அதிகரித்து தேனீர் விற்பனை குறைவது வழக்கம் என்பதால், விலையும் குறைந்துள்ளதாகவும், இந்த விலை குறைவு வரும் ஜூன் மாதம் வரை இருக்க வாய்ப்பிருப்பதாக தேயிலை வர்த்தகர்கள் தெரிவித்துள்ளனர்.