கோவை கங்கா மருத்துவமனையின் முதுகு தண்டுவட சிகிச்சை பிரிவிற்கு 5 விருதுகள்

கோவை : கொரியாவில் நடைபெற்ற ஆசிய பசிபிக் ஸ்பைன் சொசைட்டி ஆண்டு மாநாட்டில் கோவை கங்கா மருத்துவமனையின் முதுகு தண்டுவட சிகிச்சை பிரிவிற்கு 5 விருதுகள் வழங்கப்பட்டது. 

கொரியாவின் சியோல் நகரில் நடைபெற்ற ஆசிய பசிபிக் ஸ்பைன் சொசைட்டி ஆண்டு மாநாட்டில் பல்வேறு நாடுகளைச் சேர்ந்த தலைசிறந்த 600 அறுவை சிகிச்சை மருத்துவர்கள் கலந்து கொண்டனர். இதில், மருத்துவ ஆராய்ச்சி மற்றும் அடிப்படை அறிவியல் ஆராய்ச்சி அறிக்கைகளின் அடிப்படையில் சிறந்த மருத்துவக் குழு தேர்வு செய்யப்பட்டு விருது வழங்கப்பட்டது. அதில், கோவையைச் சேர்ந்த கங்கா மருத்துவமனையின் சார்பில் மருத்துவ ஆராய்ச்சி அறிக்கை சமர்பிக்கப்பட்டது. பின்னர், அறிக்கையில் இடம்பெற்றுள்ளபடி, மிகவும் கடினமான சிகிச்சை முறைகள் குறித்து கங்கா மருத்துவக் குழு விளக்கிக் கூறியது. 

இதைத் தொடர்ந்து, ஆசிய ஸ்பைன் ஜார்னலின் சிறந்த பேப்பர் அவார்டு உள்பட 5 முக்கிய விருதுகளை கங்கா மருத்துவமனையின் முதுகு தண்டுவட சிகிச்சை பிரிவிற்கு வழங்கப்பட்டது. அனைவரின் கவனத்தையும் ஈர்த்த கங்கா மருத்துவமனையின் மருத்துவ ஆராய்ச்சி அறிக்கையை, மருத்துவர்கள் எஸ். ராஜசேகரன், அஜோய் பிரசாத் ஷெட்டி, ரிஷி முகேஷ் கண்ணா மற்றும் திலீப் சந்த் ராஜா ஆகியோர் அடங்கிய குழு தயாரித்தது. இந்த அறிக்கையை ஆசிய பசிபிக் ஸ்பைன் சொசைட்டி மாநாட்டில் மருத்துவர் திலீப் வழங்கினார்.