மக்களவை தேர்தலில் போட்டியிடும் வேட்பாளர்களிடம் 12 அம்ச கோரிக்கைகள் வலியுறுத்தல்

கோவை : மக்களவை தேர்தலில் போட்டியிடும் வேட்பாளர்களிடம் 12 அம்ச கோரிக்கையை குடிமக்கள் செயல்பாட்டு  குழு, வளரிளம் மற்றும் பெண் தொழிலாளர்களுக்கான பாதுகாப்பு கூட்டமைப்பு முன்வைத்துள்ளது.

குடிமக்கள் செயல்பாட்டு குழு, வளரினம் மற்றும் பெண் தொழிலாளர்களுக்கான பாதுகாப்பு கூட்டமைப்பினரின் பத்திரிக்கையாளர் சந்திப்பு கோவை பிரஸ் கிளப்பில் நடைபெற்றது. அப்போது, விவசாயத்திற்கு அடுத்த படியாக, மக்களுக்கு பெருமளவு வேலை வாய்ப்பினை வழங்கும் பஞ்சாலை தொழில் ஒப்பந்த முறையில் கொத்தடிமைகளாக வளரிளம் பெண்கள் பணியமர்த்தப்பட்டு உடல் ரீதியாகவும், பாலியல் ரீதியாக பாதிக்கப்படும் பெண்களுக்கான தேர்தல் கோரிக்கைகள் வெளியிடப்பட்டது. இதில், கல்வி,வேலைவாய்ப்பு, குறைந்த பட்ச ஊதியம், அடையாள அட்டை மற்றும் பணி நிரந்தரம், குழந்தைகள் தொடர்பான சட்டங்களை நடைமுறைபடுத்த வேண்டும் உள்ளிட்ட கோரிக்கைகள் முன்வைக்கப்பட்டது.

இதன்பின்னர் செய்தியாளர்களிடம் அக்கூட்டமைப்பினர் கூறியதாவது :- தமிழகத்தில் 3,000 பஞ்சாலைகள் உள்ளது. மேற்கு மண்டலத்தில் 1,600-க்கும்  மேற்பட்ட ஆலைகள் உள்ளன. இங்கு மூன்று லட்சம் பெண்கள் பணிபுரிகின்றனர். அதில், இரண்டு லட்சம் பேர் இளம் பெண்கள் தொழிலாளர்கள் உள்ளனர். பணியில் அமர்த்தப்படுவர்களுக்கு குறைந்தபட்ச ஊதியம் 421 ரூபாய் வழங்கப்பட்டு, பயிற்சி முடித்த பின்னர் நிரந்தரம் செய்து ரூ. 18,000 வழங்கிட வேண்டும் என தொடர்ந்து கோரிக்கை வைக்கப்பட்டு வருகிறது. ஆனால், இதுவரை இது நடைமுறைப்படுத்தப் படவில்லை. குழந்தை தொழிலாளர்களின் வயது வரம்பை 18 ஆக பதிக்கப்பட வேண்டும். இதற்கு உரிய கமிட்டிகள் அமைத்து நடைமுறைப்படுத்த வேண்டும். மேலும், பஞ்சாலை தொழிற்சாலைகளில் உள்ள விடுதிகள் பதிவு செய்யப்பட்டு உள்ளனவா..? எனவும், அப்படி பதிவு செய்யப்படாதவைகள் மீது நடவடிக்கைகள் மேற்கொள்ள வேண்டும். 450 நாட்கள் வேலை பார்த்து இருப்பின், பணி நிரந்தரம் செய்யப்பட வேண்டும்.

10 பெண்களுக்கு மேல் பணிபுரியும் இடத்தில் ஐ.சி.சி. கமிட்டியை நடைமுறைப்படுத்த வேண்டும். இவை அனைத்தும் சட்டத்தில் இருப்பினும், இதனை மதிப்பதே இல்லை. போராடி பெற்ற உரிமைகளை நசுக்க முயலுகின்றனர். இவை அனைத்தும் நிறைவேற்றப்பட வேண்டும். கோவை, திருப்பூர், ஈரோடு, நீலகிரி, திருநெல்வேலி, விருதுநகர், தூத்துக்குடி, ராமநாதபுரம், திண்டுக்கல், மதுரை, புதுக்கோட்டை உள்ளிட்ட மாவட்டங்களில் போட்டியிடும் வேட்பாளர்களிடம் அளிக்கப்பட உள்ளோம், என்றனர்.

இந்த சந்திப்பின் போது, ஹெச்.எம்.எஸ்.மாநில பொது செயலாளர் ராஜாமணி, எம்.எல்.எப். மாநில பொது செயலாளர் பழனிசாமி, ஐ.என்.டி.யு.சி மாநில செயலாளர் பாலசுந்தரம், சி.ஐ.டி.யு. திருப்பூர் மாவட்ட பஞ்சாலை சங்க செயலாளர் ஈஸ்வரமூர்த்தி, சமூக கல்வி மற்றும் முன்னேற்ற மைய செயல் இயக்குனர் நம்பி, மனித உரிமை அமைப்பு வழக்கறிஞர் சகாதேவன், சமூக ஆய்வாளர் நாராயணசாமி உள்ளிட்டோர் உடன் இருந்தனர்.