கோவையில் தொடர் குற்ற செயல்களில் ஈடுபட்டு வந்த 3 பேர் குண்டர் சட்டத்தின் கீழ் கைது

கோவை : கோவை மாநகரம் மற்றும் மாவட்ட காவல் எல்லைகளில் தொடர்ந்து பல்வேறு குற்ற சம்பவங்களில் ஈடுபட்டு வந்த 3 பேர் மீது மாவட்ட ஆட்சியரின் உத்தரவின் பேரில் குண்டர் சட்டம் பாய்ந்தது. 

வீரகேரளம் பகுதியைச் சேர்ந்த ராஜேந்திரன் என்பவரின் மகன் நிரஞ்சன், வடவள்ளி பகுதியைச் சேர்ந்த புண்ணியமூர்த்தி என்பவரின் மகன் அருண் ரீகன் என்ற அருண் ஹாசன், அதே பகுதியைச் சேர்ந்த ராஜேந்திரன் என்பவரின் மகன் கார்த்திக் ஆகிய 3 பேரின் மீது ஆள் கடத்தல், கொலை முயற்சி, கொள்ளை, வழிப்பறி, பெண்களுக்கு எதிரான பாலியல் வன்கொடுமை உள்ளிட்ட 10 வழக்குகள் தற்போது நிலுவையில் உள்ளன.

அதேபோல, கோவை மாநகரம் மற்றும் மாவட்ட காவல்துறையினரால் பல ஆண்டுகள் தேடப்பட்டு வந்த மூவரும், கடந்த 15 நாட்களுக்கு முன்பு வடவள்ளி பகுதியில் ஒரு பெண்ணுக்கு வன்கொடுமை மற்றும் டாஸ்மாக் பார் அடித்து சேதப்படுத்தப்பட்ட வழக்கில் கைது செய்யப்பட்டனர்.

இந்த நிலையில் தொடர்ந்து குற்ற வழக்குகளில் ஈடுபட்டு வந்ததால் மாவட்ட காவல் கண்காணிப்பாளர் சுஜித் குமார் ஐபிஎஸ், மாவட்ட காவல் துணை கண்காணிப்பாளர் பாலமுருகன், ஆகியோர் பரிந்துரையின் பேரில், அவர்களை குண்டர் சட்டத்தில் கைது செய்ய மாவட்ட ஆட்சித் தலைவர் ராஜாமணி உத்தரவிட்டார். அதன்படி, கோவை மாவட்டம் முழுவதும் சுமார் 28 குற்றச்சம்பவங்களில் ஈடுபட்டு வந்த மூன்று பேர் மீதும் குண்டர் சட்டம் பாய்ந்தது.