பொள்ளாச்சி விவகாரம் : தி.மு.க. வழக்கறிஞர் அணியினர் கோவை சி.பி.சி.ஐ.டி. அலுவலகத்தில் மனு

கோவை : பொள்ளாச்சி பாலியல் விவகாரத்தில் சி.பி.ஐ.க்கு விசாரணை மாற்றப்பட்டுள்ள நிலையில், சி.பி.சி.ஐ.டி. போலீசார் ஏன் விசாரணைக்கு அழைக்க வேண்டும் என மணிமாறன் தரப்பு வழக்கறிஞர்கள் சி.பி.சி.ஐ.டி., அலுவலகத்தில் மனு அளித்துள்ளனர்.

பொள்ளாச்சியில் முகநூல் மூலம் கல்லூரி மாணவிகளிடம் நட்பாக பழகி ஆபாச படம் எடுத்து, பாலியல் தொந்தரவு கொடுத்த வழக்கில் திருநாவுக்கரசு மற்றும் அவரது நண்பர்கள் 4 பேர் கைது செய்யப்பட்டனர். இதையடுத்து, இந்த வழக்கு மாவட்ட போலீசாரிடமிருந்து சி.பி.சி.ஐ.டி. போலீசாருக்கு மாற்றப்பட்டது. இந்த வழக்கில் அரசியல் பிரமுகர்களுக்கும் தொடர்பு இருப்பதாக சந்தேகிக்கப்படுவதால், இந்த பாலியல் வழக்கை சி.பி.ஐ.க்கு மாற்றம் செய்து தமிழக அரசு அரசாணை பிறப்பித்திருந்தது. 

இருப்பினும், இந்த வழக்கு குறித்து சி.பி.சி.ஐ.டி. போலீசார் விசாரணை மேற்கொண்டு வருகின்றனர். குறிப்பாக, பொள்ளாச்சி மாக்கினாம்பட்டியில் உள்ள திருநாவுக்கரசின் வீடு, பண்ணை வீடு மற்றும் இதர குற்றவாளிகளின் வீடு என பல்வேறு பகுதிகளில் சோதனையில் ஈடுபட்டனர். மேலும், இந்த வழக்கு தொடர்பாக திருநாவுக்கரசின் சம்பந்தப்பட்ட பல நபர்களிடம் போலீசார் விசாரணை மேற்கொண்டுள்ளனர். அதேபோல, தமிழக காங்கிரஸ் கமிட்டியின் மாநில பொறுப்பாளர் மயூரா ஜெயக்குமாருக்கும் சம்மன் அனுப்பப்பட்டு விசாரணை மேற்கொள்ளப்பட்டது. 

இந்த நிலையில், தி.மு.க.வின் கோவை புறநகர் தெற்கு மாவட்டப் பொறுப்பாளர் தென்றல் செல்வராஜ் மகன் மணிமாறன் மற்றும் பார் நாகராஜுக்கு சி.பி.சி.ஐ.டி. போலீஸ் சம்மன் அனுப்பியுள்ளனர். 

இந்த நிலையில், பொள்ளாச்சி பாலியல் விவகாரத்தில் சி.பி.ஐ.க்கு விசாரணை மாற்றப்பட்டுள்ள நிலையில், சி.பி.சி.ஐ.டி. போலீசார் ஏன் விசாரணைக்கு அழைக்க வேண்டும் என மணிமாறன் தரப்பு வழக்கறிஞர்கள் சி.பி.சி.ஐ.டி., அலுவலகத்தில் மனு அளித்துள்ளனர். 

மேலும் சி.பி.சி.ஐ.டி. அலுவலகத்தில் ஆஜரான தி.மு.க. தரப்பு வழக்கறிஞர்கள் பின்னர் செய்தியாளர்களிடம் கூறியதாவது :- எங்கள் கட்சியைச் சேர்ந்த தென்றல் மணிமாறன் என்பவருக்கு சி.பி.சி.ஐ.டி. போலீசார் சம்மன் கொடுத்துள்ளனர். அதுவும் இந்த சம்மனை அதிகாலை 3 மணிக்கு சி.பி.சி.ஐ.டி. போலீசார் மணிமாறனிடம் கொடுத்துள்ளனர். மணிமாறனுக்கும், இந்த வழக்கிற்கும் எந்த சம்பந்தமும் கிடையாது. இந்த வழக்கு சி.பி.ஐ.க்கு மாற்றப்பட்டுள்ளது. இது தொடர்பான ஆணையும் பிறப்பிக்கப்பட்டுள்ளது. அதை தொடர வேண்டும் என உயர்நீதிமன்றம் உத்தரவிட்டுள்ளது. அதைக் குறிப்பிட்டு சி.பி.ஐ.,யில் ஆஜராகிறோம், என தெரிவித்துள்ளார்.