கட்சி தாவுபவர்களைப் பற்றி அ.ம.மு.க. எப்போதும் கவலை கொள்ளாது : முன்னாள் எம்.எல்.ஏ. சின்னசாமி

கோவை : கட்சி விட்டு கட்சி தாவுபவர்களைப் பற்றி அ.ம.மு.க. எப்போதும் கவலை கொள்ளாது என முன்னாள் எம்.எல்.ஏ. சின்னசாமி தெரிவித்துள்ளார். 

தினகரனின் அம்மா மக்கள் முன்னேற்றக் கழகத்தின் மூத்த தலைவர்கள் அடுத்தடுத்து, கட்சியில் இருந்து விலகி, தி.மு.க. மற்றும் அ.தி.மு.க.வில் இணைந்து வருகின்றனர். டி.டி.வி. தினகரன் அணியில் இருந்த முன்னாள் எம்.எல்.ஏ., செந்தில் பாலாஜி, தி.மு.க.வில் இணைந்தார். இவரைத் தொடர்ந்து, எந்தவித தகவலும் இல்லாமல் வி.பி. கலைராஜன் அ.ம.மு.க.வில் இருந்து விலகி, ஸ்டாலின் முன்னிலையில் தி.மு.க.வின் ஐக்கியமாகிக் கொண்டார். 

இந்த நிலையில், மக்களவை தேர்தலில் கோவை தொகுதியில் அ.ம.மு.க. சார்பில் போட்டியிடும் வேட்பாளர் என்.ஆர். அப்பாதுரையின் அறிமுகக் கூட்டம் இன்று நடைபெற்றது. இதில், சிங்காநல்லூர் முன்னாள் எம்.எல்.ஏ. ஆர். சின்னசாமி கலந்து கொண்டு உரையாற்றினார். அப்போது, அவர் பேசியதாவது :- நாங்கள் முதுகில் குற்றுபவர்கள் இல்லை. கட்சி விட்டு கட்சி தாவுபவர்களைப் பற்றி அ.ம.மு.க. எப்போதும் கவலை கொள்ளாது. ஆனால், அனைவரையும் கவரக்கூடியவராகவும், நம்பிக்கை மிகுந்த தலைவராகவும் டி.டி.வி. தினகரன் திகழ்ந்து வருகிறார். இதைத் தொடர்ந்து, அவர் கட்சியில் இருந்து உடனடியாக நீக்கப்பட்டார். கட்சியின் அனைத்து நிர்வாகிகளையும் கண்காணித்துக் கொண்டுதான் வருகிறோம். அவர்களின் நடத்தை எங்கள் தலைமையுடன் ஒத்துப் போகவில்லை எனில், அவர்களை அகற்றுவதற்கும் பயப்பட மாட்டோம்." என்றார். 



இதைத் தொடர்ந்து, கோவை தொகுதியின் வேட்பாளர் அப்பாதுரை பேசுகையில், "உங்களைப் போல நானும் சாதாரண கட்சி தொண்டன் தான்," எனக் கூறினார். 

முன்னதாக, பூத் வாரியாக தேர்தல் பிரச்சாரத்தை மேற்கொள்வது குறித்து கட்சியின் தலைவர்களுக்கு மாவட்ட மக்களவை தேர்தல் பொறுப்பாளர் சிவசாமி ஆலோசனை வழங்கினார்.