மைனர் பெண்ணை பலாத்காரம் செய்தவரின் மீது போக்சோ சட்டத்தின் கீழ் நடவடிக்கை எடுங்கள் : காவல்துறைக்கு நீதிமன்றம் உத்தரவு

கோவை : மைனர் பெண்ணை கடத்தி பாலியல் வன்கொடுமைக்கு உள்ளாக்கிய நபர் மீது போக்சோ சட்டத்தின் கீழ் நடவடிக்கை எடுக்க வேண்டும் என காவல்துறையினருக்கு மேட்டுப்பாளையம் குற்றவியல் நீதிமன்றம் உத்தரவிட்டுள்ளது.

கோவை மாவட்டம் மேட்டுப்பாளையத்தை சேர்ந்தவர் ரம்யா தேவி. 17 வயது மாணவியான இவரை அதே பகுதியைச் சேர்ந்த இவரது உறவினரான தண்டபாணி என்பவர் கடந்த ஜனவரி மாதம் கடத்தி சென்றதாகக் கூறப்படுகிறது. உடனடியாக இது குறித்து மாணவியின் பெற்றோர், தங்களது மைனர் பெண்ணை, உறவுக்காரரான தண்டபாணி என்பவர் கடத்தி சென்று விட்டதாக மேட்டுப்பாளையம் காவல் நிலையத்தில் புகார் அளித்துள்ளனர். ரம்யா தேவியை திருமணம் செய்து கொள்வதாக ஆசைவார்த்தை கூறி டெல்லிக்கு கடத்தி சென்ற தண்டபாணி அங்கு அவரை பலமுறை பாலியல் வன்கொடுமைக்கு உள்ளாக்கியுள்ளார். பின்னர், சேலத்தில் உள்ள தனது நண்பர் வீட்டிற்கு மாணவியை அழைத்துச் சென்றுள்ளார். 



அப்போது, தான் ஏமாற்றப்பட்டதை உணர்ந்த மாணவி ரம்யா தேவி, சேலத்தில் இருந்து தப்பித்து மேட்டுப்பாளையம் வந்துள்ளார். தனது பெற்றோரிடம் தான் பாலியல் வன்புணர்ச்சிக்கு உள்ளாக்கப்பட்டதையும், தண்டபாணி தன்னை அடித்து துன்புறுத்தியதையும், அவரின் பிடியில் இருந்து தப்பித்து வந்ததையும் ரம்யா தேவி கூறியுள்ளார். இதனையடுத்து, மாணவியினை அழைத்துக்கொண்டு மேட்டுப்பாளையம் காவல்நிலையம் சென்ற அவரது பெற்றோர் இது குறித்து விரிவான புகார் மனு அளித்துள்ளனர். ஆனால், இப்புகார் மீது கடந்த ஒரு மாதமாக எவ்வித நடவடிக்கையும் எடுக்கப்படவில்லை எனத் தெரிகிறது. 

இதனால், ஏமாற்றமடைந்த ரம்யா தேவி மற்றும் அவரது பெற்றோர் இன்று மேட்டுப்பாளையம் குற்றவியல் நடுவர் நீதிமன்ற நீதிபதி முன்பு ஆஜராகி நடந்த சம்பவங்கள் குறித்து மனு அளித்தனர். இதனை விசாரித்த மேட்டுப்பாளையம் நீதிபதி சரவணபாபு, உடனடியாக ரம்யா தேவியின் புகார் மீது நடவடிக்கை எடுக்கவும், மைனர் பெண்ணை கடத்திச்சென்று பாலியல் வன்புணர்ச்சிக்கு உள்ளாக்கிய நபர் மீது போக்சோ சட்டத்தின் கீழ் வழக்குப் பதிவு செய்யவும் காவல்துறைக்கு உத்தரவிட்டார். 

இதனையடுத்து, ரம்யா தேவி மற்றும் அவரது பெற்றோர் கோவை துடியலூரில் உள்ள மகளிர் காவல்நிலையத்தில் தண்டபாணி மீது புகார் அளித்துள்ளனர்.