பேரறிவாளன் உள்ளிட்ட 7 பேர் ஒருவாரத்திற்குள் விடுதலை செய்ய வாய்ப்பு : எம்.எல்.ஏ., தனியரசு நம்பிக்கை

கோவை : பேரறிவாளன் உள்ளிட்ட 7 பேரும் ஒரு வார காலத்திற்குள் விடுதலை செய்ய வாய்ப்புள்ளதாக கோவையில் நடைபெற்ற மனிதசங்கிலி போராட்டத்தில் பங்கேற்ற சட்டமன்ற உறுப்பினர் தனியரசு நம்பிக்கை தெரிவித்துள்ளார்

முன்னாள் பிரதமர் ராஜீவ் காந்தி கொலை வழக்கில் 28 ஆண்டுகளாக சிறையில் உள்ள பேரறிவாளன், நளினி உள்ளிட்ட 7 பேரை விடுதலை செய்யக்கோரி இன்று பல்வேறு இடங்களில் மனிதசங்கிலி போராட்டம் நடைபெற்றது. இதன் ஒரு பகுதியாக கோவை காந்திபுரம் பகுதியில் உள்ள நஞ்சப்பா சாலையில் மனித சங்கிலி போராட்டம் நடந்தது. இதில், த.பெ.தி.க., சி.பி.ஐ., அ.ம.மு.க., வி.சி.க., தி.வி.க., உள்ளிட்ட பல்வேறு அமைப்புகள் மற்றும் கட்சிகளைச் சேர்ந்த 500-க்கும் மேற்பட்டோர் கலந்து கொண்டனர்.



அப்போது, 7 பேரை விடுதலை செய்யக்கோரி பறையடித்து முழக்கங்களை எழுப்பினர்.மேலும், தமிழக அமைச்சரவை தீர்மானப்படி, தமிழக ஆளுநர் காலதாமதம் செய்யாமல் விடுதலை கோப்பில் கையெழுத்திட வேண்டுமென வலியுறுத்திய போராட்டக்காரர்கள், இல்லையெனில் இதன் விளைவுகள் நாடாளுமன்ற தேர்தலில் எதிரொலிக்கும், என்றனர்.



இந்த மனித சங்கிலி போராட்டத்தில் பங்கேற்ற சட்டமன்ற உறுப்பினரும், கொங்கு இளைஞர் பேரவை தலைவருமான தனியரசு செய்தியாளர்களுக்கு பேட்டியளித்தார். அவர் கூறியதாவது :- பேரறிவாளன் உள்ளிட்ட 7 பேரும், ஒருவார காலத்திற்குள் விடுதலை செய்ய வாய்ப்புள்ளது. மேலும், 7 பேர் விடுதலைக்கான வாய்ப்பு நெருங்கி வருகிறது. எழுவர் விடுதலையை எதிர்நோக்கி 7 கோடி தமிழர்களும் காத்திருக்கின்றனர். தமிழக ஆளுநர் விடுதலை கோப்பில் விரைவில் கையெழுத்திடுவார். இல்லையெனில் அனைத்து கட்சிகள் சார்பில் ஆளுநர் மாளிகை முன்பு போராட்டம் நடைபெறும். 7 பேரின் விடுதலைக்காக அ.தி.மு.க., அரசு மத்திய பா.ஜ.க., அரசிற்கு அழுத்தம் தர வேண்டும், எனத் தெரிவித்தார்.