அடுத்த ஆண்டு ஜுலை மாதம் நடக்கும் புத்தகக் கண்காட்சி : புதிதாக 3 இலக்கிய விருதுகள் வழங்க முடிவு

கோவை : கோவை கொடிசியாவில் அடுத்த ஆண்டு ஜுலை 19-ம் தேதி தொடங்கவிருக்கும் புத்தகக் கண்காட்சியில், முதல்முறையாக இந்த ஆண்டு முதல் 3 இலக்கிய விருதுகள் வழங்க முடிவு செய்யப்பட்டுள்ளது. 

வழக்கமாக, ஆண்டுதோறும் ஒரு மூத்த படைப்பாளிக்கு இந்தப் புத்தகவிழாவை ஒட்டி வாழ்நாள் சாதனையாளர் விருது வழங்கப்படுகிறது. இது ஒரு லட்சம் ரூபாயும், விருதுச் சிற்பமும் கொண்டது. இந்த ஆண்டு முதல் மேலும் 3 இலக்கிய விருதுகள் வழங்கப்படுகின்றன. புனைவு, கட்டுரை, கவிதை ஆகிய மூன்று வகைகளில் இவ்விருதுகள் வழங்கப்படுகின்றன. அதோடு, தலா ரூ. 25,000 மற்றும் விருதுச் சான்றிதழும் அடங்கியது.

இவ்விருதுக்குரிய படைப்புகள் 2017, 2018-ல் வெளியானவையாக இருக்க வேண்டும். பரிசு பெறுவோர் 1-1-2019 அன்று 40 வயதை மிகாதவர்களாக இருக்க வேண்டும். படைப்புகள் நூறு பக்கங்களுக்கு குறையாதவையாக இருக்க வேண்டும். [கவிதை நூல்களுக்கு விதிவிலக்கு] படைப்புகளை அது தன்னால் எழுதப்பட்டது, நிபந்தனைகளுக்கு உட்பட்டது என்னும் தற்சான்றுடன் அனுப்ப வேண்டும்.