கோவையில் இருந்து டெல்லிக்கு நேரடி விமான சேவை : பயணிகள் வரவேற்பு

கோவை : பல்வேறு நாடுகளுக்குச் செல்லும் இணைப்பு விமானங்களுக்கு ஏற்றவாறு, கோவையில் இருந்து டெல்லிக்கு நேரடி விமானசேவை அறிமுகம் செய்யப்பட்டுள்ளது.

கோவை விமான நிலையத்தில் உள்நாடு மற்றும் வெளிநாடுகளுக்குச் செல்லும் விமான சேவைகளின் எண்ணிக்கையை அதிகரிக்க வேண்டும் கோவை கொங்கு குளோபல் ஃபார்ம் மற்றும் சிஐஐ கோவை, சீமா, கொடிசியா ஆகிய நிறுவனங்கள் சார்பில் மத்திய அரசுக்கு தொடர்ந்து வலியுறுத்தப்பட்டது. இந்த நிலையில், கோவையில் இருந்து டெல்லிக்கு நேரடி விமான சேவையை அறிமுகப்படுத்தப்பட்டுள்ளது. இது கோவை மக்களுக்குக் கிடைத்த மேலும் ஒரு வரப்பிரசாதம் ஆகும். 

ஏர் இந்தியா நிறுவனம் இந்த சேவையை வழங்கி வருகிறது. அதாவது, வரும் நவம்பர் 30-ம் தேதி முதல் நள்ளிரவில் கோவையில் இருந்து புறப்பட்டு, அதிகாலை 05.30 மணிக்கு டெல்லியை சென்றடையும் வகையில் பயணத் திட்டம் வகுக்கப்பட்டுள்ளது. இதன் மூலம், நாட்டின் வட மற்றும் கிழக்கு பகுதிகளில் இருக்கும் 33 இடங்களுக்குச் செல்லும் இணைப்பு விமானங்களைப் பிடிக்க முடியும். மேலும், 09.30 மணிக்கு அந்த நகரங்களுக்குச் சென்றடையலாம்.

இந்த விமானத்தில் பயணிக்க 15 நாட்களுக்கு முன்னதாக டிக்கெட் முன்பதிவு செய்தால், கோவையில் இருந்து டெல்லிக்கு ரூ.2,944-ம், டெல்லியில் இருந்து கோவைக்கு ரூ. 2,971-ம் கட்டணமாக வசூலிக்கப்படும். அதுமட்டுமில்லாமல், 25 கிலோ எடையளவிற்கு பயண உடைமைகளை எடுத்துச் செல்லலாம். எக்ஸ்டிரா லெக்ரூம், உணவு, சரியான இணைப்பு போன்ற வசதிகளைப் பெறலாம்.

இந்த ஆண்டு மார்ச் மாதத்தில் கோவையில் இருந்து டெல்லி சென்று வர ரூ.18,000 கட்டணத்தை பயணிகள் செலவிட்டு வந்தது குறிப்பிடத்தக்கது.