மதுரை விமான நிலையத்திற்கு முத்துராமலிங்கத் தேவர் பெயரை வைக்க எதிர்ப்பு: கிருஷ்ணசாமியை கண்டித்து கோவையில் ஆர்ப்பாட்டம்

கோவை, ஜனவரி 7

மதுரை விமான நிலையத்திற்கு பசும்பொன் முத்துராமலிங்கத் தேவரின் பெயரை வைக்க எதிர்ப்பு தெரிவித்த புதிய தமிழகம் கட்சித் தலைவர் கிருஷ்ணசாமியை கண்டித்து தேவர் முன்னணியினர் கோவையில் ஆர்ப்பாட்டம் நடத்தினர்.



மதுரை விமான நிலையத்திற்கு பசும்பொன் முத்துராமலிங்கத்தின் பெயரை சூட்ட வேண்டும் என்ற கோரிக்கை 25 ஆண்டுகளுக்கு மேலாக வலியுறுத்தப்பட்டு வருகிறது. இந்த நிலையில், தலைவர்களின் பெயரை மத்திய, மாநில அரசு வளாகங்களுக்கு சூட்டக்கூடாது என்று புதிய தமிழகம் கட்சியின் நிறுவனர் கிருஷ்ணசாமி எதிர்ப்பு தெரிவித்தார்.

இந்த எதிர்ப்புக்கு கண்டனம் தெரிவிக்கும் வகையில் தேவர் முன்னணியைச் சேர்ந்த 10-க்கும் மேற்பட்டோர் இன்று கோவை தெற்கு தாலுகா அலுவலகம் முன்பு ஆர்ப்பாட்டத்தில் ஈடுபட்டனர்.



இது குறித்து தேவர் முன்னணியின் மாநில பொதுச் செயலாளர் நரசிங்க மூர்த்தி கூறுகையில், 'கிருஷ்ணசாமி சாதி வேற்றுமை உணர்வுகளைத் தூண்டி வருகிறார். மதுரை விமான நிலையத்திற்கு பசும்பொன்னாரின் பெயரை வைக்க எதிர்ப்பு தெரிவித்திருப்பது கண்டனத்திற்குரியது' என்றார்.

முன்னதாக இந்த ஆர்ப்பாட்டத்தின் போது கிருஷ்ணசாமியை எதிர்த்து கோஷங்கள் எழுப்பிய தேவர் முன்னணியினர் அவரது உருவப்படத்தை கிழித்து ஆர்ப்பாட்டம் நடத்தினர்.