மடத்துக்குளம் ராஜவாய்க்காலை தூர்வாரி குடிமராமத்து பணிகள் மேற்கொள்ள கோரி விவசாயிகள் மனு

Coimbatore: திருப்பூர் மாவட்டம் மடத்துக்குளம் அருகே உள்ள காரத்தொழவு அமராவதி பழைய ராஜவாய்க்காலில் குடிமராமத்து பணிகளை மேற்கொண்டு தூர்வார நடவடிக்கை எடுக்க வேண்டும் என வலியுறுத்தி விவசாயிகள் திருப்பூர் மாவட்ட ஆட்சியர் அலுவலகத்தில் கோரிக்கை மனு அளித்தனர்.



விவசாயிகள் அளித்த மனுவில், காரத்தொழவு பகுதியில் அமைந்துள்ள ராஜவாய்க்கால் பல ஆண்டுகளாக தூர்வாரப்படாமல் பராமரிப்பின்றி உள்ளதாக தெரிவித்துள்ளனர். இதனால் அந்த வாய்க்காலை நம்பியுள்ள சுமார் 12 கிலோமீட்டர் சுற்றளவில் உள்ள ஆயிரத்திற்கும் மேற்பட்ட ஏக்கர் நஞ்சை நிலங்கள் போதிய பாசன வசதி பெற முடியாமல் உள்ளதாகவும், இதன் காரணமாக விவசாய உற்பத்தி கடுமையாக பாதிக்கப்பட்டுள்ளதாகவும் கூறியுள்ளனர்.

மேலும், வாய்க்காலில் படிந்துள்ள மணல் மற்றும் புதர்களால் நீரோட்டம் தடைபட்டு, நிலங்களுக்கு தண்ணீர் சீராக சென்றடைவதில் சிக்கல் ஏற்பட்டுள்ளதாக தெரிவித்துள்ளனர். இதனால் பல விவசாயிகள் முறையான சாகுபடி மேற்கொள்ள முடியாமல் பொருளாதார இழப்பை சந்தித்து வருவதாகவும் அவர்கள் குறிப்பிட்டுள்ளனர்.

எனவே, தமிழ்நாடு அரசு உடனடியாக ராஜவாய்க்காலை தூர்வாரி குடிமராமத்து பணிகளை மேற்கொண்டு நீரோட்டத்தை சீரமைக்க நடவடிக்கை எடுக்க வேண்டும் என காரத்தொழவு அமராவதி பழைய ராஜவாய்க்கால் நீரை பயன்படுத்தும் விவசாயிகள் வலியுறுத்தியுள்ளனர்.