கோவையில் செல்போனில் பேசியபடி நடந்த இளைஞர் இரண்டாவது மாடியில் இருந்து விழுந்து பலி

Coimbatore: கோவை வடவள்ளி பகுதியில் செல்போனில் பேசிக் கொண்டே மாடிக்கு நடந்து சென்ற இளைஞர் ஒருவர் இரண்டாவது மாடியில் இருந்து தவறி விழுந்து பரிதாபமாக உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.




புதுக்கோட்டை மாவட்டம் திருவேங்கை வாசலை சேர்ந்தவர் விவேக் (33). இவர் கோவை வடவள்ளி பகுதியில் தங்கி ஜேசிபி ஆபரேட்டராக பணியாற்றி வந்தார். சம்பவம் நடந்த நேரத்தில், விவேக் தனது மனைவி சிவரஞ்சனியிடம் செல்போனில் உரையாடிக் கொண்டிருந்தார்.




பேசிக் கொண்டே மாடிக்கு நடந்து சென்று கொண்டிருந்த விவேக், எதிர்பாராத விதமாக இரண்டாவது மாடியில் இருந்து சமநிலை இழந்து தவறி கீழே விழுந்தார். திடீரென நடந்த இந்த விபத்தைக் கண்ட அக்கம்பக்கத்தினர் உடனடியாக ஓடிவந்து அவரை மீட்டனர்.




பலத்த காயம் அடைந்த நிலையில், விவேக்கை உடனடியாக கோவை அரசு மருத்துவமனையில் சேர்த்து சிகிச்சை அளிக்கப்பட்டது. ஆனால் சிகிச்சை பலனளிக்காமல் நேற்று மார்ச் 24ஆம் தேதி விவேக் பரிதாபமாக உயிரிழந்தார்.




இந்த சம்பவம் தொடர்பாக கோவை வடவள்ளி போலீசார் வழக்குப்பதிவு செய்து மேலும் விசாரணை நடத்தி வருகின்றனர். செல்போனில் கவனம் சிதறி நடப்பது எவ்வளவு ஆபத்தானது என்பதை இந்த சம்பவம் உணர்த்துகிறது.