உடுமலையில் கனமழை: தேசிய நெடுஞ்சாலையில் வெள்ளப்பெருக்கு, வாகன ஓட்டிகள் சிரமம்

Coimbatore: திருப்பூர் மாவட்டம் உடுமலை நகராட்சி மற்றும் சுற்றுவட்டார பகுதிகளில் இன்று காலை முதலே குளிர்ந்த காற்றுடன் அவ்வப்போது சாரல் மழை பெய்து வந்தது. இந்நிலையில், மாலை 5 மணி அளவில் இடைவிடாமல் கனமழை பெய்யத் தொடங்கியது.

ஒரு மணி நேரத்துக்கும் மேலாக தொடர்ந்து பெய்த கனமழையால், கோவை-திண்டுக்கல் தேசிய நெடுஞ்சாலையில் கடும் வெள்ளப்பெருக்கு ஏற்பட்டது. இதன் காரணமாக, வாகனங்கள் மிகவும் மெதுவாக ஊர்ந்து செல்லும் நிலை ஏற்பட்டது. வாகன ஓட்டிகள் பெரும் சிரமத்திற்கு உள்ளாகினர்.



மேலும், நகராட்சிக்கு உட்பட்ட யூ.எஸ்.எஸ். காலனி உட்பட பல்வேறு பகுதிகளில் சாக்கடைகளில் இருந்து கழிவுநீர் வீடுகளுக்குள் புகுந்ததால் பொதுமக்கள் கடும் அவதி அடைந்தனர். வீடுகளுக்குள் புகுந்த வெள்ளத்தை அகற்றுவதில் குடியிருப்பாளர்கள் சிரமப்பட்டனர்.

இந்த திடீர் கனமழை காரணமாக, பொதுமக்களின் இயல்பு வாழ்க்கை பாதிக்கப்பட்டுள்ளது. வெள்ள நீரை அகற்றவும், பாதிக்கப்பட்ட பகுதிகளில் நிவாரண நடவடிக்கைகளை மேற்கொள்ளவும் உள்ளாட்சி அதிகாரிகள் களத்தில் இறங்கியுள்ளனர். மேலும் மழை பெய்யும் பட்சத்தில் பொதுமக்கள் எச்சரிக்கையுடன் இருக்குமாறு அறிவுறுத்தப்பட்டுள்ளனர்.