கல்லூரி மாணவர்களிடையே கஞ்சா புழக்கம்: விழிப்புடன் இருக்க கல்லூரி நிர்வாகங்களுக்கு காவல் கண்காணிப்பாளர் அறிவுரை

கோவை: கோவை மாவட்டத்தில் கல்லூரி மாணவர்களிடையே கஞ்சா புழக்கம் அதிகரித்து வருவதாக தகவல்கள் வெளியாகியுள்ளன. இதனையடுத்து, போதைப்பொருள் இல்லாத கோவையை உருவாக்கும் நோக்கில் கோவை மாவட்ட காவல் கண்காணிப்பாளர் Dr. K. கார்த்திகேயன் தீவிர நடவடிக்கை எடுத்து வருகிறார்.

இந்நிலையில், நேற்று (28.08.2024) தடாகம் காவல்துறையினர் மதுக்கரை தனியார் கல்லூரியில் சோதனை நடத்தினர். அப்போது, அக்கல்லூரியில் மூன்றாம் ஆண்டு படிக்கும் கடலூர் மாவட்டத்தை சேர்ந்த அன்பழகன் மகன் ராகுல் (20) என்பவரிடமிருந்து 3 கிலோ கஞ்சா பறிமுதல் செய்யப்பட்டது. இதையடுத்து அவரை காவல்துறையினர் கைது செய்தனர்.

இச்சம்பவத்தைத் தொடர்ந்து, மாவட்ட காவல் கண்காணிப்பாளர் Dr. K. கார்த்திகேயன், கல்லூரி நிர்வாகங்களுக்கு முக்கிய அறிவுரை வழங்கியுள்ளார். அதன்படி, கல்லூரி மாணவர்கள் படிப்பில் கவனம் செலுத்தவும், போதைப் பொருள்களுக்கு இடம் அளிக்காமல் விழிப்புடன் இருக்கவும் வலியுறுத்தியுள்ளார். மேலும், கல்லூரி விடுதி அல்லது வேறு இடங்களில் தங்கியிருக்கும் மாணவர்களின் நடவடிக்கைகளை கண்காணிக்குமாறும், சந்தேகப்படும் படியாக இருப்பின் உடனடியாக காவல்துறைக்கு தகவல் தெரிவிக்குமாறும் கல்லூரி நிர்வாகங்களுக்கு அறிவுறுத்தியுள்ளார்.

இந்த நடவடிக்கை மூலம், கல்லூரி மாணவர்களிடையே கஞ்சா போன்ற போதைப் பொருட்களின் பயன்பாட்டை கட்டுப்படுத்தி, அவர்களின் எதிர்காலத்தை பாதுகாக்க முடியும் என காவல்துறை நம்பிக்கை தெரிவித்துள்ளது.