பல்லடம் அருகே பெங்களூர் செல்லும் தனியார் பேருந்து ஓட்டுநர் மதுபோதையில் இருந்தது கண்டுபிடிக்கப்பட்டது. பொதுமக்கள் அவரை சிறைபிடித்து போலீசாரிடம் ஒப்படைத்தனர். டி.எஸ்.பி. விஜிகுமார் விசாரணை மேற்கொண்டார்.
Coimbatore: பல்லடம் அருகே தனியார் பேருந்தை மதுபோதையில் ஓட்டி வந்த ஓட்டுநரை பொதுமக்கள் சிறைபிடித்த சம்பவம் பரபரப்பை ஏற்படுத்தியுள்ளது.
பொள்ளாச்சியில் இருந்து பெங்களூர் நோக்கி சுமார் 50 பயணிகளுடன் சென்று கொண்டிருந்த தனியார் பேருந்து, பல்லடம் அருகே வடுகபாளையம் பகுதியை அடைந்தபோது, பேருந்து தாறுமாறாக ஓடியதை கவனித்த பொதுமக்கள், பேருந்தை நிறுத்தி ஓட்டுநரை பரிசோதித்தனர்.
ஓட்டுநரிடமிருந்து ஜூஸ் பாட்டிலில் மதுவை கலந்து வைத்திருந்ததை கண்டுபிடித்த பொதுமக்கள், உடனடியாக பல்லடம் போலீசாருக்கு தகவல் தெரிவித்தனர். சம்பவ இடத்திற்கு விரைந்து வந்த போலீசார், ஓட்டுநர் வெங்கடாசலபதி (32) என்பவரை காவல் நிலையத்திற்கு அழைத்துச் சென்றனர்.
விசாரணைக்கு வந்த பல்லடம் டி.எஸ்.பி. விஜிகுமார், மது போதையில் வாகனம் ஓட்டியது உறுதி செய்யப்பட்டால், ஓட்டுநரின் வாகன ஓட்டுநர் உரிமம் ரத்து செய்யப்படும் என்று எச்சரித்தார். பின்னர், ஓட்டுநர் வெங்கடாசலபதிக்கு மருத்துவ பரிசோதனை மேற்கொள்ளப்பட்டதில், அவர் மது அருந்தியிருந்தது உறுதி செய்யப்பட்டது.
இதனிடையே, பாதி வழியில் நின்றுவிட்ட பயணிகளுக்கு போலீசார் மாற்று ஓட்டுநரை ஏற்பாடு செய்து, பயணத்தை தொடர அனுமதித்தனர். இச்சம்பவம் அப்பகுதியில் சிறிது நேரம் பரபரப்பை ஏற்படுத்தியது.