விஜயகாந்த் பிறந்தநாள்: கோவையில் தேமுதிக தொண்டர்கள் கொண்டாட்டம்

கோவை ஆர் எஸ் புரம் பகுதியில் தேமுதிக தொண்டர்கள் கட்சியின் நிறுவனர் விஜயகாந்தின் பிறந்தநாளை சிறப்பாகக் கொண்டாடினர். தமிழ் திரையுலகம் மற்றும் அரசியல் உலகில் முக்கிய ஆளுமையாக விளங்கிய புரட்சி கலைஞர் விஜயகாந்தின் பிறந்தநாள் விழா தேமுதிக நிர்வாகிகள் மற்றும் அவரது திரைப்பட ரசிகர்களால் கொண்டாடப்பட்டது.

தேமுதிக கட்சியின் மாவட்ட செயலாளர் சிங்கை சந்துரு மற்றும் விஜயகாந்தின் தீவிர ரசிகர் சுலைமான் உள்ளிட்டோர் தலைமையில் பிறந்தநாள் கொண்டாட்ட நிகழ்ச்சி நடைபெற்றது. இந்நிகழ்வில் தேமுதிக கொடியேற்றப்பட்டு, விஜயகாந்தின் படத்திற்கு மாலை அணிவித்து மரியாதை செலுத்தப்பட்டது.

இந்நிகழ்வின் சிறப்பு அம்சமாக, ராஜகுரு பாரதி தம்பதியின் ஆண் குழந்தைக்கு விஜயகாந்தின் மகன் பெயரான 'விஜய பிரபாகரன்' என பெயர் சூட்டப்பட்டது. மேலும், அக்குழந்தைக்கு தங்க மோதிரமும் அணிவிக்கப்பட்டது.



இதனைத் தொடர்ந்து, சுமார் 500க்கும் மேற்பட்ட பொதுமக்களுக்கு அசைவ விருந்து அன்னதானமாக வழங்கப்பட்டது. இவ்வாறு தேமுதிக தொண்டர்கள் தங்கள் தலைவரின் பிறந்தநாளை உற்சாகமாகக் கொண்டாடினர்.