பொள்ளாச்சி வடுகபாளையம் ரயில்வே கேட் மீண்டும் திறப்பு: மக்கள் மகிழ்ச்சி

கோவை: பொள்ளாச்சி வடுகபாளையம் பகுதியில் நூறாண்டுகளாக செயல்பட்டு வந்த ரயில்வே கேட் மீண்டும் பொதுமக்கள் பயன்பாட்டிற்கு திறக்கப்பட்டுள்ளது. இந்த ரயில்வே கேட் மூடப்பட்டதால் பொதுமக்கள், மாணவர்கள் மற்றும் மருத்துவமனைக்கு செல்பவர்கள் மிகுந்த சிரமத்திற்கு உள்ளாகினர்.



இந்நிலையில், முன்னாள் அமைச்சரும், பொள்ளாச்சி சட்டமன்ற உறுப்பினருமான பொள்ளாச்சி V.ஜெயராமன் அவர்களின் தொடர் முயற்சியால் இந்த ரயில்வே கேட் மீண்டும் திறக்கப்பட்டுள்ளது. அவர் மாவட்ட ஆட்சியர் மற்றும் ரயில்வே துறை உயர் அதிகாரிகளை நேரில் சந்தித்து, மேம்பாலம் அல்லது சுரங்கப்பாதை அமைக்கப்படும் வரை இந்த ரயில்வே கேட்டை மீண்டும் திறக்க வேண்டும் என்று கோரிக்கை விடுத்தார்.



இதன் விளைவாக, ஆகஸ்ட் 5 ஆம் தேதி ரயில்வே நிர்வாகம் வடுகபாளையம் ரயில்வே கேட்டை மீண்டும் பொதுமக்கள் பயன்பாட்டிற்கு திறந்து விட்டது. இந்த நல்ல செய்தியை அறிந்த அப்பகுதி மக்கள் பொள்ளாச்சி V.ஜெயராமனுக்கு சிறப்பான வரவேற்பு அளித்து தங்களது நன்றியை தெரிவித்தனர்.

இந்த மகிழ்ச்சிகரமான தருணத்தை கொண்டாடும் விதமாக, பொள்ளாச்சி V.ஜெயராமன் அப்பகுதி மக்களுக்கு இனிப்புகள் வழங்கி தனது மகிழ்ச்சியை பகிர்ந்து கொண்டார். இந்த முடிவு அப்பகுதி மக்களின் அன்றாட வாழ்க்கையை எளிதாக்கியுள்ளதோடு, அவர்களின் பாதுகாப்பையும் உறுதி செய்துள்ளது.