சிறுவாணி அணையின் நீர்மட்டம் 30 அடியாக உயர்வு: தொடர் மழையால் மேலும் அதிகரிக்க வாய்ப்பு

கோவை: கோவையின் முக்கிய நீராதாரங்களில் ஒன்றான சிறுவாணி அணையின் நீர்மட்டம் தொடர் மழையால் 30 அடியாக உயர்ந்துள்ளது. கேரள மாநிலம் பாலக்காட்டில் மேற்குத் தொடர்ச்சி மலையில் அமைந்துள்ள இந்த அணையின் மொத்த நீர்த்தேக்க உயரம் 50 அடி ஆகும்.

மழை பொய்த்ததால் இந்தாண்டு துவக்கத்தில் 26 அடியாக இருந்த நீர் மட்டம், மேற்கு தொடர்ச்சி மலைப்பகுதிகளில் தற்போது பெய்து வரும் மழையால் படிப்படியாக அதிகரிக்கத் துவங்கியுள்ளது. கடந்த ஜூலை 8ம் தேதி அடிவாரத்தில் 12 மி.மீ. மற்றும் அணைப்பகுதியில் 55 மி.மீ. மழை பதிவாகி நீர் மட்டம் 28 அடியாக உயர்ந்தது.

நேற்று (ஜூலை 13) காலை 8:00 மணி நிலவரப்படி அடிவாரத்தில் 17 மி.மீ. மழையும், அணைப்பகுதியில் 73 மி.மீ. மழையும் பதிவாகியிருந்தது. இதையடுத்து அணையின் நீர்மட்டம் 30 அடியாக உயர்ந்தது. தற்போது அணையில் இருந்து 5.88 கோடி லிட்டர் நீர் குடிநீருக்காக எடுக்கப்பட்டு வருகிறது.

மேற்கு தொடர்ச்சி மலையில் தொடர்ந்து மழை பெய்து வருவதால் வரும் நாட்களில் அணையின் நீர்மட்டம் மேலும் உயர வாய்ப்புள்ளது. இது கோவை மாவட்டத்தின் குடிநீர் தேவையை பூர்த்தி செய்வதில் பெரும் உதவியாக இருக்கும் என எதிர்பார்க்கப்படுகிறது.