கோவை பேரூர் பட்டீஸ்வரர் கோவிலில் இன்று ஆடிப்பெருக்கையொட்டி அதிகாலை முதலே பக்தர்கள் ஆயிரக்கணக்கில் திரண்டு தரிசனம் செய்தனர்.
கோவை: கோவை பேரூர் நொய்யல் ஆற்றில் ஆடிப்பெருக்கு விழாவை பக்தர்கள் கொண்டாடி வருகின்றனர்.
நொய்யல் கரையோரப் பகுதிகளில் ஆடிப்பெருக்கு விழா ஒவ்வொரு ஆண்டும் ஆடி மாதம் 18-ந் தேதி கொண்டாடப்படுகிறது. அந்த நாளில் நொய்யல் தாய்க்கு நன்றி தெரிவிக்கும் வகையில் ஆடிப்பெருக்கு விழா கொண்டாடப்படுகிறது.
ஆடிப்பெருக்கை முன்னிட்டு பக்தர்களும் பொதுமக்களும் நொய்யல் ஆற்றில் வந்து புனித நீராடி தங்கள் இஷ்ட தெய்வங்களையும் குலதெய்வங்களையும் மற்றும் பேரூர் பட்டீஸ்வரர் சாமியை வழிபட்டு செல்வது வழக்கம்.
புதுமண தம்பதிகள் தங்கள் திருமணத்தின் போது அறிவித்திருந்த மலர் மாலைகளை நொய்யல் ஆற்றில் விட்டு புனித நீராடி வழிபடுவார்கள். பெண்கள் அனைவரும் மாங்கல்ய பாக்கியம் நிலைக்க வேண்டி ஒருவருக்கொருவர் மஞ்சள் கயிற்றை அணிந்து கொள்வார்கள்.
கன்னிப்பெண்கள் தங்களுக்கு விரைவில் திருமணம் நடைபெற வேண்டியும், நல்ல மணமகன் அமைய வேண்டியும், நொய்யல் தாயை வழிபட்டு மஞ்சள் கயிறுகளை கட்டி கொள்வார்கள். இதன் அடிப்படையில் இன்று காலையிலிருந்து கோவை உட்பட பல்வேறு மாவட்டங்களில் இருந்து ஏராளமான பக்தர்களும் பொதுமக்களும் பேரூர் வந்தனர். இவர்கள் பேரூர் நொய்யல் ஆற்றில் நீராடி பேரூர் பட்டீஸ்வரர் சாமியை வழிபட்டு சென்றனர்.
