நடிகர் ரஜினியின் காலா திரைப்படம் ஏப்., 27-ம் தேதி ரிலீஸ்

ரசிகர்களின் பலத்த எதிர்பார்ப்புக்கு மத்தியில் நடிகர் ரஜினிகாந்த் நடித்துள்ள காலா திரைப்படம் வரும் ஏப்ரல் 27-ம் தேதி வெளியிடப்படுவதாக அறிவிக்கப்பட்டுள்ளது. 

நடிகர் ரஜினிகாந்த் நடிப்பில் வொண்டர்பார் பிலிம்ஸ் சார்பில் தயாராகியுள்ள திரைப்படம் காலா. இந்த படத்தில் ஹுமா குரேஷி, நானா படேகர், அஞ்சலி பாட்டீல், சமுத்திர கனி உள்ளிட்டோர் நடித்துள்ளனர். சிறுவயதில் திருநெல்வேலியில் இருந்து மும்பைக்கு தப்பி செல்லும் ரஜினிகாந்த், அங்கு சக்தி வாய்ந்த டானாக தாராவியில் வாழ்ந்து வருகிறார். அவரை எதிர்ப்பவர்களுக்கு காலாவாக அவர் இருக்கிறார்.

வொண்டர்பார் பிலிம்ஸ் நிறுவனத்தின் சார்பில் நடிகர் தனுஷ் தயாரிப்பில், பா. ரஞ்சித் இயக்கத்தில் உருவாகியுள்ள இப்படத்திற்கு சந்தோஷ் நாராயண் இசையமைத்து உள்ளார். இந்த நிலையில், காலா படத்தின் வெளியீடு தேதி இன்றிரவு 7 மணிக்கு அறிவிக்கப்படும் என நடிகர் தனுஷ் தனது டுவிட்டரில் தெரிவித்திருந்தார். அதன்படி, காலா திரைப்படம் வரும் ஏப்ரல் 27-ம் தேதி உலகமெங்கும் திரைக்கு வருவதாக அறிவிக்கப்பட்டுள்ளது. 

இந்த அறிவிப்பைத் தொடர்ந்து, ரஜினியின் ரசிகர்கள் உற்சாகமடைந்துள்ளனர். ரஜினியின் அரசியல் பிரவேசத்திற்கு பிறகு வெளியாகவிருக்கும் முதல்படம் என்பதால், காலா திரைப்படம் பெரும் எதிர்பார்ப்பை ஏற்படுத்தியுள்ளது.