பார்மசி கல்லூரி அரங்கில் 'சம்பரமா' கலை விழா துவங்கியது

ஊட்டி பார்மசி கல்லூரி அரங்கில் 'சம்பரமா' கலை விழா துவங்கியது. இதில் 'இயல், இசை, நாடக கலையை மாணவ, மாணவியர் பாதுகாத்து, வளர்க்க வேண்டும்' என, கல்லூரி கலை விழாவில் தெரிவிக்கப்பட்டது.

ஊட்டி ஜெ.எஸ்.எஸ்., பார்மசி கல்லூரி அரங்கில், 'சம்பரமா' என்ற பெயரில் கலை விழா நேற்று துவங்கியது. நிகழ்ச்சிக்கு தலைமை வகித்து, தமிழ்நாடு பார்மசி கவுன்சில் தலைவர் டாக்டர் சின்னசாமி பேசுகையில், கல்லூரி மாணவ, மாணவியர் இயல், இசை, நாடகம் என்ற முத்தமிழ் கலையை பாதுகாக்க, வளர்க்க வேண்டும் என்றார்.



சிறப்பு அழைப்பாளராக, மைசூரு ஜெ.எஸ்.எஸ்., பல்கலை கழக பதிவாளர் டாக்டர் மஞ்சுநாதா பேசினார்.

கோவை ராமகிருஷ்ணா மருத்துவமனையில் பணிபுரியும் நாளமில்லா சுரபி சார்ந்த மருத்துவ நிபுணர் சுரேஷ் தாமோதரன், கோவை ஜெம் மருத்துவமனை செயல் இயக்குனர் சங்கீதப்பிரியா, சென்னை 'அபெக்ஸ்' லேபாரட்டரி நிறுவன செயல் இயக்குனர் விஷாகன் ஆகியோர் பேசினர்.

இதனைத்தொடர்ந்து, மாணவியர் அபர்ணா, தாமினி, ஜனனி தலைமையிலான மாணவியர் குழுவினர் வரவேற்பு நடனம் நிகழ்த்தினர்.

முன்னதாக, கல்லூரி முதல்வர் டாக்டர் தனபால் அனைவரையும் வரவேற்று உரையாற்றினார். துணை முதல்வர் அப்சப் அசாம் நன்றி கூறினார்.

இந்நிகழ்ச்சியில், ஜெ.எஸ்.எஸ்., பல்கலையின் கீழ் செயல்படும், ஐந்து கல்லூரி மாணவ, மாணவியர் பங்கேற்க உள்ளனர். இதில், வினாடி- வினா, நடனம், நாட்டியம் உட்பட பல நிகழ்ச்சிகள் நடத்தப்பட உள்ளன. நாளை மதியம் (மார்ச் 11) நிறைவு விழா நடைபெறவுள்ளது.