கோவை காந்திபுரத்தில் கூடுதல் பார்க்கிங் கட்டணம் வசூல்: குத்தகைதாரருக்கு ரூ.25,000 அபராதம்

Coimbatore: கோயம்புத்தூர் மாநகராட்சி மத்திய மண்டலம் வார்டு எண்.68க்கு உட்பட்ட காந்திபுரம், சீனிவாசபுரம் பகுதியில் உள்ள இரண்டு மற்றும் நான்கு சக்கர வாகனம் நிறுத்துமிட குத்தகைதாரர் சுமதிக்கு, நிர்ணயிக்கப்பட்ட கட்டணத்தை விட கூடுதலாக பணம் வசூலித்ததற்காக ரூ.25,000 அபராதம் விதிக்கப்பட்டுள்ளது.

இந்த நிறுத்துமிடத்தை பயன்படுத்தும் வாகன ஓட்டிகளிடமிருந்து பெறப்பட்ட புகாரின் அடிப்படையில், மாநகராட்சி அலுவலர்களால் ஆய்வு மேற்கொள்ளப்பட்டது. இந்த ஆய்வின்போது, குத்தகைதாரர் சுமதி, மாநகராட்சியால் நிர்ணயம் செய்யப்பட்ட வாகன நிறுத்தக்கட்டணத்தை விட கூடுதலாக பணம் வசூலித்து வந்தது கண்டறியப்பட்டது.

இதையடுத்து, சம்மந்தப்பட்ட மாநகராட்சி அலுவலர்கள் மூலமாக சுமதிக்கு எச்சரிக்கை விடுக்கப்பட்டது. நிர்ணயிக்கப்பட்ட கட்டணத்தை வசூலிக்காமல் கூடுதல் தொகை வசூலித்து மாநகராட்சிக்கு அவப்பெயர் ஏற்படுத்தியமைக்காகவும், ஏல நிபந்தனைகளை மீறியமைக்காகவும் ரூ.25,000 அபராதம் விதிக்கப்பட்டுள்ளது.

மேலும், இனிவரும் காலங்களில் இதுபோன்று கூடுதல் கட்டணம் வசூலிக்கப்பட்டால், உரிமம் இரத்து செய்யப்படும் என அறிவுறுத்தப்பட்டுள்ளது. இது தொடர்பான எச்சரிக்கை அறிவிப்புகள் மாநகராட்சியின் அனைத்து வாகன நிறுத்துமிட குத்தகைதாரர்களுக்கும் வழங்கப்பட்டுள்ளதாக மாநகராட்சி சார்பில் தெரிவிக்கப்பட்டுள்ளது.