பாலமலை பழங்குடியினருக்கு தேனீ வளர்ப்பு பயிற்சி மற்றும் உபகரணங்கள் வழங்கப்பட்டன

கோவை: தமிழ்நாடு வேளாண்மைப் பல்கலைக்கழக வேளாண் பூச்சியியல் துறையும், இந்திய எண்ணெய் நிறுவனமும் இணைந்து "மதுரம்" திட்டத்தின் கீழ் பாலமலை மாவட்ட பழங்குடியின மக்களுக்கான தேனீ வளர்ப்பு பயிற்சி மற்றும் உபகரணங்கள் வழங்கும் நிகழ்ச்சியை ஏற்பாடு செய்தன.

இந்த நிகழ்ச்சியின் முக்கிய நோக்கம் தேனீ பற்றிய விழிப்புணர்வை ஏற்படுத்துவதோடு, தேன் உற்பத்தியை அதிகரிப்பதும் ஆகும். கோயம்புத்தூர் மாவட்டம் பெரியநாயக்கன்பாளையம் தொகுதி நாயக்கன்பாளையம் பஞ்சாயத்திற்குட்பட்ட பாலமலை கிராமத்தில் உள்ள பழங்குடியின மக்களிடையே அறிவியல் ரீதியான தேனீ வளர்ப்பை ஊக்குவித்தல், வாழ்வாதாரத்தை மேம்படுத்துதல் மற்றும் ஊட்டச்சத்து பாதுகாப்பை மேம்படுத்துதல் ஆகியவை இந்த நிகழ்ச்சியின் குறிக்கோள்களாகும்.



பூச்சியியல் துறை பேராசிரியர் முனைவர் இரா. வாசாமிநாதன், இந்திய தேனீ கூடுகளை ஆய்வு செய்வதன் முக்கியத்துவத்தை விளக்கினார். பல்வேறு தேனீ இனங்கள், வகைகள் மற்றும் தேனீக்கூட்டின் அமைப்பு ஆகியவற்றை அவர் விளக்கினார். மேலும், ராணி தேனீ, ஆண் தேனீ மற்றும் பணித்தேனீ பற்றியும், பருவகால மேலாண்மை, கூடுகளை பிரித்து ஒன்றிணைத்தல் மற்றும் தேன் அறுவடை செய்தல் பற்றியும் செய்முறை விளக்கம் அளித்தார்.



பூச்சியியல் துறை இணை பேராசிரியர் முனைவர் G. பிரீத்தா, தேனீ வளர்ப்பு உபகரணங்களைக் கையாளுதல் மற்றும் அவற்றின் பயன்கள் தொடர்பான தொழில்நுட்ப அமர்வை நடத்தினார். கோடை மற்றும் குளிர்காலம் போன்ற பற்றாக்குறை காலங்களில் தேனீக்களுக்கு அளிக்க வேண்டிய செயற்கை உணவின் முக்கியத்துவம் பற்றியும் அவர் விளக்கமளித்தார். சர்க்கரை மற்றும் தண்ணீரை 1:1 என்ற விகிதத்தில் கலந்து தேனீ கூட்டங்களுக்கு வழங்க வேண்டும் என்று அவர் கூறினார்.

பூச்சியியல் துறை முனைவர் சி. சௌமியா செயற்கை உணவு வழங்கும் முறையை செய்முறையுடன் விளக்கினார். பாலமலை மலையைச் சுற்றியுள்ள பல்வேறு தேனீ தாவரங்கள் மற்றும் தேனீக்களுக்கு உணவளிக்கும் பயிர்கள் குறித்தும் அவர் தெரிவித்தார். புகைப்பான் மற்றும் தேன் எடுக்கும் முறையையும் செயல்முறை விளக்கத்துடன் செய்து காண்பித்தார்.



எல். வெள்ளிங்கிரி என்ற பழங்குடி வீட்டு முற்றத்தில் தேனீக்களை வெற்றிகரமாக பராமரித்து வருவதாகவும், தேனீ கூட்டங்கள் நல்ல நிலையில் உள்ளதாகவும் கூறினார். அவர் கையுறைகள் அல்லது முக்காடு பயன்படுத்தாமல் தேனீக்களைக் கையாளுவதாகவும், காலனிகளில் இருந்து இரண்டு முறை தேன் எடுக்கப்பட்டுள்ளதாகவும் தெரிவித்தார். தேன் மக்களுக்கு மிகவும் பயனுள்ளதாக இருப்பதோடு, கூடுதல் வருமானத்திற்கும் உதவுவதாக அவர் குறிப்பிட்டார்.