ஜெயலலிதாவின் சிகிச்சை குறித்த வீடியோ வெளியிட்டது விதிமீறல்: தேர்தல் ஆணையம்

டிசம்பர் 20

அப்பல்லோ மருத்துவமனையில் முன்னாள் முதலமைச்சர் ஜெயலலிதா சிகிச்சை பெற்றிருந்தது தொடர்பான வீடியோ வெளியிட்டிருப்பது விதிமீறல் எனத் தமிழக தலைமை தேர்தல் அதிகாரி ராஜேஷ் லக்கானி தெரிவித்துள்ளார்.

முன்னாள் முதலமைச்சர் ஜெயலலிதா சிகிச்சை பெற்ற வீடியோவை டிடிவி தினகரன் ஆதரவாளர் வெற்றிவேல் இன்று வெளியிட்டார். இது தொடர்பாக தனியார் டிவி ஒன்றிற்குத் தேர்தல் அதிகாரி ராஜேஷ் லக்கானி பேட்டியளிக்கையில், ஆர்.கே. நகர் தேர்தலுக்கான வாக்குப்பதிவு நடக்க உள்ள நிலையில், ஜெயலலிதா சிகிச்சை வீடியோ வெளியிடப்பட்டுள்ளது மிகப்பெரிய விதிமீறல். ஒரு கட்சியின் தலைவராக இருந்தவர் பற்றிய வீடியோ தேர்தல் பிரச்சாரமாகவே கருதப்படும்.

வீடியோ வெளியிடப்பட்டது குறித்து தினகரன் மீது நடவடிக்கை எடுக்கப்படும். அவர் மீது வழக்குப்பதிவு செய்யப்படும். அதில், அவருக்கு இரண்டு வருடச் சிறை தண்டனை விதிக்க வாய்ப்பு உள்ளது. இவ்வாறு அவர் கூறினார்.