வந்தேபாரத் ரயில் சேவை தொடக்கம் எதிரொலி - கோவையிலிருந்து புறப்படும் 3 ரயில்களின் நேரம் மாற்றம்!

தமிழகத்தின் முதல் அதிவேக ரயில் சேவையான வந்தேபாரத் ரயில் சேவையை பிரதமர் நரேந்திரமோடி சென்னையில் இன்று கொடியசைத்து தொடங்கிவைத்தார்.

சென்னை - கோவை இடையே வாரத்தின் அனைத்து நாட்களும் (புதன்கிழமை தவிர) இயக்கப்படவுள்ள இந்த வந்தே பாரத் ரயில் சேவையையொட்டி, கோவையிலிருந்து நாள்தோறும் புறப்படும் 3 முக்கிய ரயில்களின் நேரத்தை மாற்றி தென்னக ரயில்வே புதிய காலஅட்டவணையை வெளியிட்டுள்ளது.

அதன்படி, கோவையிலிருந்து பெங்களூரு வரை இயக்கப்படும் உதய் எக்ஸ்பிரஸ்(வண்டி எண்:22666/22665), நாளை முதல் காலை 5.45க்கு பதிலாக 5 நிமிடம் முன்கூட்டியே 5.40க்கு இயக்கப்படவுள்ளது.

இதேபோல், கோவை -திருப்பதி சூப்பர் பாஸ்ட் (வண்டி எண்:22616) ரயிலானது காலை 6 மணிக்கு பதிலாக 6.10க்கு 10 நிமிடம் தாமதமாக இயக்கப்படும். கோவை - சென்னை இன்டர்சிட்டி (வண்டி எண்:12680) ரயிலானது 5 நிமிடம் தாமதமாக காலை 6.20க்கு கோவையிலிருந்து புறப்படும்.

மறுமார்க்கத்தில் (வண்டி எண்:12679) சென்னை சென்ட்ரல் ரயில் நிலையத்தில் இருந்து பிற்பகல் 2.35 மணிக்கு புறப்படும். இந்த புதிய கால அட்டவணையானது நாளை முதல் (ஏப்.9) முதல் நடைமுறைக்கு வரும் என தென்னக ரயில்வே வெளியிட்டுள்ள செய்திக் குறிப்பில் தெரிவிக்கப்பட்டுள்ளது.