கோவையில் உள்ளாட்சித் தேர்தலுக்காக பலத்த பாதுகாப்புடன் மின்னணு வாக்கு இயந்திரங்கள் வருகை..!

கோவை: கோவையில் உள்ளாட்சித் தேர்தலுக்காக பலத்த பாதுகாப்புடன் மின்னணு வாக்கு இயந்திரங்கள் அனுப்பப்பட்டன.

கோவை மாவட்டத்தில் உள்ள நகராட்சிகள் மற்றும் பேரூராட்சிகளுக்கு மின்னணு ஓட்டுப்பதிவு இயந்திரங்கள் அனுப்பப்பட்டு உள்ளன.

கோவை மாவட்டத்தில், ஒரு மாநகராட்சி, 7 நகராட்சிகள், 33 பேரூராட்சிகள் உள்ளன. உள்ளாட்சித் தேர்தலில் பயன்படுத்துவதற்கான மின்னணு ஓட்டுப்பதிவு இயந்திரங்கள் மற்றும் கன்ட்ரோல் யூனிட்டுகள் ஏற்கனவே சரிபார்க்கப்பட்டு, உப்பிலிபாளையம் மாநகராட்சி வணிக வளாகத்தில் உள்ள பழைய பாஸ்போர்ட் அலுவலக வளாகத்திலும், வடகோவை மாநகராட்சி பள்ளியிலும் இருப்பு வைக்கப்பட்டுள்ளன.

தேர்தலுக்கு பயன்படுத்த, 2,322 ஓட்டுப்பதிவு இயந்திரங்கள், 20 சதவீத 'ரிசர்வ்' என, 484 இயந்திரங்கள் தயார் செய்யப்பட்டு இருந்தன.

இந்நிலையில், மாநகராட்சி 97வது வார்டில், 18 வேட்பாளர்கள் போட்டியிடுவதால், 19 பூத்களில் இரண்டு இயந்திரங்கள் பயன்படுத்தப்பட உள்ளன. வேட்பாளர்களுக்கு சின்னங்கள் ஒதுக்கி இறுதி பட்டியல் வெளியிட்டதால் 'பேலட் ஷீட்' அச்சடிக்கப்பட்டு விட்டது.

மேலும், இன்று முதல், 16ம் தேதி வரை இயந்திரங்களில் அவை பொருத்தப்பட உள்ளன. அதனால், நகராட்சிகள் மற்றும் பேரூராட்சிகளுக்கு ஒதுக்கப்பட்ட இயந்திரங்கள், மாநகராட்சி துணை ஆணையர் ஷர்மிளா முன்னிலையில் நேற்று சரிபார்க்கப்பட்டு போலீஸ் பாதுகாப்புடன் அனுப்பப்பட்டன.