கல்லறை திருநாள்: கோவையில் தங்கள் குடும்பங்களில் உயிரிழந்தவர்களுக்கு கிறிஸ்துவர்கள் மலர் அஞ்சலி..!

கோவை: இன்று உலகம் முழுவதும் கல்லறை திருநாள் கிறிஸ்துவ மக்களால் அனுசரிக்கப்படுவதை அடுத்து, தங்கள் குடும்பங்களில் உயிரிழந்தவர்களுக்குக் கல்லறைத் தோட்டங்களில் அஞ்சலி செலுத்தப்பட்டு வருகிறது.

உலகம் முழுவதும் உள்ள கிறிஸ்தவர்கள் ஆண்டுதோறும் நவம்பர் 2ம் தேதியை இறந்தவர்கள் நினைவு நாளாக கடைபிடிப்பது வழக்கம்.



அதன் ஒருபகுதியாக, கோவை சுங்கம் பகுதியில் உள்ள கல்லறைத் தோட்டத்தில் இறந்துபோன தங்கள் உறவினர்கள் மற்றும் முன்னோர்களுக்குக் கோவையில் உள்ள கிருத்துவ மக்கள் மலர் அஞ்சலி செலுத்தி வருகிறார்கள்.



இதற்காக, கோவை சுங்கம் பகுதியில் உள்ள கல்லறைத் தோட்டம் முன்பாக தற்காலிகமாக மலர் கடைகளும், வாசனை திரவிய கடைகளும் அமைக்கப்பட்டுள்ளது.



மேலும், இன்று காலை முதல் மாலை வரை கிறிஸ்தவர்கள் திரளாக சென்று கல்லறைத் தோட்டங்களில் அஞ்சலி செலுத்துவதால் இன்று காலையில் கிறிஸ்தவ ஆலயங்களிலும், மாலை 5 மணிக்குக் கல்லறைத் தோட்டங்களிலும் இறந்தவர்களின் ஆன்மா இளைப்பாறுதலுக்காக திருப்பலி அல்லது சிறப்பு வழிபாடுகளும் நடைபெறும்.



அதனைத்தொடர்ந்து, கல்லறைகளில் பங்கு அருட்பணியாளர்கள் புனித நீரை தெளிப்பார்கள். கல்லறை திருநாளையொட்டி வழக்கத்திற்கு மாறாக அதிகமான போலீசார் பாதுகாப்புப் பணிகளில் ஈடுபடுத்தப்பட்டுள்ளனர்.