கோவை மாநகராட்சியின் 93-வது வார்டு அலுவலகத்தை தெற்கு மண்டல அலுவலகத்திற்கு மாற்ற கோரிக்கை.!!

கோவை: கோவை மாநகராட்சி 93-வது வார்டு அலுவலகத்தை தெற்கு மண்டல அலுவலக வளாகத்திற்கு மாற்ற வேண்டும் என தூய்மை பணியாளர்கள் கோரிக்கை விடுத்துள்ளனர்.

கோவை குனியமுத்தூர் மெயின் ரோடு விஜயலட்சுமி மில் ஸ்டாப் அருகில் மாநகராட்சியின் 93-வது வார்டு அலுவலகம் செயல்பட்டு வந்தது. தூய்மைப் பணியாளர்கள் தங்கள் பணிகளுக்குச் செல்லும் முன் வார்டு அலுவலகம் வந்து கையெழுத்துப் போட்டுச் செல்வது வழக்கம்.

இதனிடையே 93-வது வார்டு அலுவலகம் நிர்வாக காரணங்களுக்காக அதே பகுதியில் அருகில் உள்ள சக்தி நகருக்கு மாற்றப்பட்டது. மெயின் ரோட்டில் இருந்து 3-கிலோ மீட்டர் தூரத்தில் உள்ளது. இங்கு செல்ல போதுமான பஸ் வசதி இல்லை எனக்கூறப்படுகிறது.

இதுகுறித்து தூய்மை பணியாளர் ஒருவர் கூறுகையில், ‘‘முன்னர் இருந்த வார்டு அலுவலகம் செல்ல பஸ் வசதி இருந்தது. காலை 6-மணிக்கு வார்டு அலுவலகம் வருவதற்கு வசதியாக இருந்தது. ஆனால் தற்போது மாற்றப்பட்டுள்ள இடத்திற்கு பஸ் வசதி இல்லை. மூன்று கிலோ மீட்டர் தூரம் வரை நடந்து செல்ல வேண்டியுள்ளது. 93-வது வார்டு அலுவலகத்தை மண்டல அலுவலகமான மாநகராட்சி தெற்கு மண்டல அலுவலக வளாகத்திற்கு மாற்ற வேண்டும்,’’ என்றார்.