கோவையில் தடுப்பூசி போடும் பணியில் டோக்கன் வழங்குவதில் திமுக - அதிமுகவினர் இடையே வாக்குவாதம் ஏற்பட்டதால் பரபரப்பு!

கோவை: கோவை அருகே அரசு உதவி பெறும் பள்ளியில் தடுப்பூசி போடும் பணியில் டோக்கன் வழங்குவதில் திமுக அதிமுகவினர் இடையே சில நேரம் வாக்குவாதம் ஏற்பட்டதால் அப்பகுதியில் பரபரப்பு நிலவியது.

கோவையை அடுத்த துடியலூர் வெள்ளக்கிணறு அரசு உதவி பெறும் பள்ளியில் தடுப்பூசி போடும் பணி நேற்று நடைபெற்றது. கவுண்டம்பாளையம் தொகுதி பி. ஆர். ஜி. அருண்குமார் எம்.எல்.ஏ, பார்வையிட்டு ஆய்வு செய்தார்.

அப்போது, முறையாக டோக்கன் வழங்கவில்லை என்று பொதுமக்கள் புகார் தெரிவித்தனர். உடனடியாக அவர் சம்பந்தப்பட்ட அதிகாரிகளிடம் முறையாக டோக்கன் வழங்கி பொதுமக்களுக்கு தடுப்பூசி செலுத்த வேண்டும் என கூறிவிட்டுச் சென்றார்.

அப்போது, அங்கிருந்த திமுக பிரமுகர் ஒருவர் தடுப்பூசி போட அனைத்து ஏற்பாடுகளையும் நாங்கள் செய்து வருகிறோம். நாங்கள்தான் பொதுமக்களுக்கு டோக்கன் வழங்கி இருக்கிறோம். இதில் நீங்கள் தலையிட வேண்டாம் என்று கூறியதாக தெரிகிறது.



இதனால் அங்கிருந்த அதிமுகவினருக்கும், திமுகவினருக்கும் இடையே வாக்குவாதம் ஏற்பட்டது.

இதையடுத்து, அவர்களை அங்கு இருந்தவர்கள் சமாதானம் செய்தனர். பின்னர் அவர்கள் அங்கிருந்து கலைந்து சென்றனர். இந்த காட்சிகள் சமூக வலைதளங்களில் வைரலாகி வருகிறது.