கொரோனா தடுப்பூசி இருப்பு இல்லாததால் கிணத்துக்கடவில் மக்கள் ஏமாற்றம்..!

கோவை: கொரோனா தடுப்பூசி இருப்பு இல்லாததால், கிணத்துக்கடவில் தடுப்பூசி போடும் பணி நிறுத்தபட்டது. இதனால், தடுப்பூசி போட்டுக்கொள்ள வந்த மக்கள் ஏமாற்றத்துடன் திரும்பினர்.

தமிழகத்தில் 18 வயதில் இருந்து 45 வயதுக்கு உட்பட்டவர்களுக்கு கொரோனா தடுப்பூசி போடப்பட்டு வருகிறது. கோவை மாவட்டம் கிணத்துக்கடவில் நல்லட்டிபாளையம் ஆரம்ப சுகாதார நிலையம் மற்றும் கிணத்துக்கடவு அரசு மருத்துவமனையில் கொரோனா தடுப்பூசி போடப்பட்டு வந்தது.

கிணத்துக்கடவு பகுதியில் சுமார் ஆயிரத்துக்கும் மேற்பட்டோருக்கு கொரோனா தடுப்பூசி போடப்பட்டு இருந்த நிலையில், கடந்த மூன்று நாட்களாக கொரோனா தடுப்பூசி இருப்பு இல்லாததால் தடுப்பூசி போடும் பணி தற்காலிகமாக நிறுத்தப்பட்டுள்ளதாக சுகாதாரத் துறை வட்டாரத்தில் தெரிவிக்கப்பட்டுள்ளது.

தடுப்பூசி போட தற்போது மக்களிடையே விழிப்புணர்வு ஏற்பட்டு தடுப்பூசி போட மக்கள் ஆர்வமாக மருத்துவமனைக்கு வந்து கொண்டிருக்கின்றனர். ஆனால், இருப்பு இல்லாததால் தடுப்பூசி போட வந்தவர்கள் ஏமாற்றத்துடன் திரும்பிச் செல்கின்ற நிலை ஏற்பட்டுள்ளது. எனவே, தடுப்பூசியை இருப்பு வைத்து தடுப்பூசி போடும் பணியை வேகப்படுத்த வேண்டுமென்று மக்கள் கோரிக்கை வைத்துள்ளனர்.