கொரோனாவால் பாதிக்கப்பட்ட குன்னூர் பகுதி மக்களுக்கு காவல் துறையினர் மற்றும் விவேகம் நண்பர்கள் குழு நிவாரண உதவி..!

நீலகிரி: கொரோனாவால் பாதிக்கப்பட்ட குன்னூர் எம்ஜிஆர் நகர் பகுதி மக்களுக்கு காவல் துறையினர் மற்றும் விவேகம் நண்பர்கள் குழு சார்பில் நிவாரண உதவிகள் வழங்கப்பட்டது.

நீலகிரி மாவட்டம் குன்னூர் டிடிகே சாலையில் உள்ள எம்ஜிஆர் நகர் பகுதியில் வசிக்கும் பெரும்பாலானவர்கள் தினக் கூலிகளாக உள்ளனர். இப்பகுதியில் உள்ள சிலருக்கு கொரோனா பெருந்தொற்று உறுதியாகியுள்ள நிலையில் இப்பகுதி தனிமைப்படுத்தப்பட்ட பகுதியாக அறிவிக்கப்பட்டது. இதன் காரணமாக, இங்குள்ள 130 குடும்பங்கள் அத்தியாவசியப் பொருட்கள் கிடைக்காமல் மிகவும் சிரமப்பட்டனர்.

இதனைத் தொடர்ந்து இங்குள்ள 130 குடும்பங்களுக்கு அத்தியாவசியப் பொருட்களை வழங்க நீலகிரி மாவட்ட காவல் துறை மற்றும் குன்னூர் வண்ணாரப்பேட்டை விவேகம் நண்பர்கள் குழு சார்பாக முடிவு செய்யப்பட்டு அதற்கான நிகழ்ச்சி இன்று நடைபெற்றது. இதில் மாவட்ட காவல் கண்காணிப்பாளர் த.பாண்டியராஜன் கலந்து கொண்டு பயனாளிகளுக்கு, அரிசி, பருப்பு, காய்கறி உள்ளிட்ட அத்தியாவசியப் பொருட்களை வழங்கினார். இந்த நிகழ்ச்சியில் குன்னூர் காவல் துணைக் கண்காணிப்பாளர் சுரேஷ், காவல் ஆய்வாளர் பிருதிவிராஜ், உதவி ஆய்வாளர் நசீர் உள்ளிட்டப் பலர் கலந்து கொண்டனர்.