வால்பாறை அரசு மருத்துவமனைக்கு சொந்த செலவில் ஆம்புலன்ஸ் வாகனம் வழங்கிய எம்எல்ஏ அமுல் கந்தசாமி..!

கோவை: வால்பாறை அரசு மருத்துவமனைக்கு அமுல் கந்தசாமி எம்எல்ஏ., தனது சொந்த செலவில் வென்டிலேட்டர் வசதியுடன் கூடிய ஆம்புலன்ஸ் வாகனம் வழங்கினார்.

கோவை மாவட்டம் வால்பாறை தனித்தொகுதியில் கடந்த சட்டமன்றத் தேர்தலில் அதிமுக சார்பில் போட்டியிட்டு வெற்றி பெற்றவர் அமுல் கந்தசாமி. இவர் கடந்த தேர்தல் பிரசாரத்தின் போது வால்பாறை அரசு மருத்துவமனைக்கு வென்டிலேட்டர் வசதியுடன் கூடிய நவீன ஆம்புலன்ஸ் வாகனத்தை தனது சொந்த செலவில் வாங்கித் தருவதாக உறுதி அளித்து இருந்தார். நடந்து முடிந்த தேர்தலில் அமுல் கந்தசாமி வெற்றி பெற்று வால்பாறை சட்டமன்ற உறுப்பினராக தேர்வு செய்யப்பட்டுள்ளார்.

இந்தநிலையில், அவர் அளித்த வாக்குறுதியின்படி வால்பாறை அரசு மருத்துவமனைக்கு வெண்டிலேட்டர் உட்பட நவீன வசதிகளுடன் கூடிய ஆம்புலன்ஸ் வாகனம் வாங்கப்பட்டுள்ளது. இன்னும் ஒருசில தினங்களில் இந்த ஆம்புலன்ஸ் வாகனம் வால்பாறை அரசு மருத்துவமனையில் ஒப்படைக்கப்பட உள்ளது. தேர்தல் நேரத்தில் கொடுத்த வாக்குறுதியை உடனடியாக நிறைவேற்றும் வால்பாறை சட்டமன்ற உறுப்பினர் அமுல் கந்தசாமிக்கு பொதுமக்கள் மகிழ்ச்சியுடன் நன்றியையும் பாராட்டுகளையும் தெரிவித்துள்ளனர்.