செய்தியாளர்களுக்கு இ-பாஸ் தேவையில்லை..! அடையாள அட்டை போதும் - காவல்துறை அறிவிப்பு!

கோவை: செய்தியாளர்களுக்கு இ-பாஸ் தேவையில்லை எனவும் அடையாள அட்டை போதும் என்று காவல்துறை சார்பில் தெரிவிக்கப்பட்டுள்ளது.

தமிழகத்தில் கொரோனா பரவலை கட்டுப்படுத்த ஊரடங்கு அமலில் உள்ளது. பத்திரிகையாளர்கள் முன்களப் பணியாளர்களாக கருதப்படுவார்கள் என முதலமைச்சர் மு.க.ஸ்டாலின் அறிவித்துள்ளார். ஆனால், பத்திரிகையாளர்களை பணி செய்யவிடாமல் காவல்துறையினர் தடுப்பதாக புகார்கள் எழுந்தன.

முன்களப் பணியாளர்களாக பத்திரிகையாளர்களிடம் இ-பதிவு கேட்டு, அவர்களின் வாகனங்களை நிறுத்தி போலீசார் வாக்குவாதம் செய்வதாக சென்னை பத்திரிகையாளர் மன்றம் குற்றம்சாட்டியது. இவ்விவகாரத்தில் தமிழக முதலமைச்சர் தலையிட்டு காவல்துறைக்கு உத்தரவிட வேண்டுமென பத்திரிகையாளர் மன்றம் கேட்டுக்கொண்டது.

இந்நிலையில், பத்திரிகையாளர்களுக்கு இ-பதிவு தேவையில்லை என்று காவல்துறை அறிவித்துள்ளது.

இதுகுறித்து தமிழக காவல்துறை வெளியிட்டுள்ள செய்தியில் தெரிவித்திருப்பதாவது,

ஊடகவியலாளர்கள் தங்களது அடையாள அட்டையை பயன்படுத்தி மாநிலம் முழுவதும் பயணிக்கலாம் என்று தெரிவித்துள்ளது. அடையாள அட்டை, ஊடகவியலாளர் அங்கீகார அட்டை, பத்திரிகையாளர் மன்ற அடையாள அட்டை ஆகியவற்றை பயன்படுத்தி பத்திரிகையாளர்கள் மாநிலம் முழுவதும் பயணிக்கலாம். இனி பத்திரிகையாளர்களிடம் இ-பதிவு கேட்கப்படாது என்று தமிழக காவல்துறை தெரிவித்துள்ளது.

மேலும், மருத்துவர்கள், சுகாதார துறையினர், பத்திரிகை ஊடகத்துறையினர், அத்தியாவசிய பணியாளர்கள், மத்திய மாநில அரசு பணியாளர்கள், தலைமை செயலக அலுவலகர்கள், தூதரக அதிகாரிகள், வழக்கறிஞர்கள் பணி நிமித்தமாக செல்லும்போது இ-பதிவு தேவையில்லை என தமிழக காவல்துறை தெரிவித்துள்ளது.