வாக்காளர் பட்டியலில் இருந்து இறந்தவர்கள் மற்றும் இடம்பெயர்ந்தவர்களின் பெயரை நீக்குவது குறித்து பொள்ளாச்சி சார் ஆட்சியர் அலுவலகத்தில் ஆலோசனை கூட்டம்

பொள்ளாச்சி: வாக்காளர் பட்டியலில் இருந்து இறந்தவர்கள் மற்றும் நிரந்தரமாக இடம் பெயர்ந்தவர்களின் பெயரை நீக்குவது குறித்து, பொள்ளாச்சி சார் ஆட்சியர் அலுவலகத்தில், இன்று அனைத்து கட்சி ஆலோசனை கூட்டம் நடைபெற்றது.

பொள்ளாச்சி சார் ஆட்சியர், வைத்திநாதன் தலைமை தாங்கிய இக்கூட்டத்தில், தாசில்தார் தணிகைவேல், தேர்தல் பிரிவு தாலுகா அலுவலர், சுப்ரியா மற்றும் பல்வேறு கட்சியை சேர்ந்த நிர்வாகிகள் பலர் கலந்து கொண்டனர்.

இக்கூட்டத்தில் பேசிய அதிகாரிகள், "சட்டமன்ற தொகுதிக்குட்பட்ட வாக்குச்சாவடிக்குட்பட்ட பகுதியில் 1500 வாக்காளர்களுக்கு மேல் இருந்தால், அந்த வாக்குச்சாவடியில் உள்ள பட்டியலிருந்து வாக்காளரை பிரித்து, குறைவான வாக்குச்சாவடியில் உள்ள வாக்காளர் பட்டியலில் இணைக்க வேண்டும். மேலும், இறந்த நபர்களோ, நிரந்தரமாக இடம்பெயர்ந்தவர்களின் பெயர்களோ, வாக்காளர் பட்டியலில் இருந்தால், அதனை நீக்குவதற்கான வழிவகை செய்ய வேண்டும்."

வாக்குச்சாவடிகளில் பராமரிப்பு பணிகள் எவ்வாறு உள்ளது என கண்டறிந்து, அதில் குறைகள் இருந்தால் அதை உடனே அதிகாரிகளிடம் தெரிவிக்கலாம். ஓட்டுக்கூரையில் செயல்படும் வாக்குச்சாவடிகள், அருகே உள்ள கான்கிரீட் கட்டிடத்தில் செயல்பட நடவடிக்கை எடுக்கப்படும். 100 சதவீதம் வாக்களிக்கும் வகையில், விடுபட்ட புதிய வாக்காளர்களை வாக்காளர் பட்டியலில் இணைக்க, நடவடிக்கை எடுக்க வேண்டும், என்று வலியுறுத்தினார். 

வாக்காளர் பட்டியல்களை சரிபார்த்து, அதில் உள்ள குறைபாடுகளை களைய அனைத்து கட்சியினரும் ஒத்துழைப்பு அளிக்க, கேட்டுகொள்ளப்படுகிறது, என்றனர்.