3.15 லட்சம் முகக்கவசங்கள் மட்டுமே இருப்பில் உள்ளதால்; கோவையில் ரேசன் கடைகளில் முககவசங்கள் வழங்குவதில் தாமதம் ஏற்பட வாய்ப்பு

கோவை: கோவை மாவட்டத்தில் உள்ள ரேசன் கடைகளில் முககவசங்கள் வழங்குவதற்காக 62 லட்சம் முககவசங்கள் தேவை என அதிகாரிகள் தெரிவித்துள்ளனர். ஆனால், தற்போது 3.15 லட்சம் முகக்கவசங்கள் மட்டுமே இருப்பில் உள்ளதால் முககவசங்கள் வழங்குவதில், தாமதம் ஏற்பட்டுள்ளது.

தமிழகத்தில் ரேசன் கார்டில் உள்ள குடும்ப உறுப்பினர் ஒருவருக்கு தலா 2 முகக்கவசம் வீதம் அனைவருக்கும் இலவச முககவசம் வழங்கப்படும் என்று தமிழக அரசு அறிவித்து இருந்தது.

அதன்படி, கோவை மாவட்டத்தில் உள்ள 1,442 ரேசன் கடைகள் மூலம், சுமார் 9 லட்சம் ரேசன்கார்டு தாரர்களுக்கு 62 லட்சம் முகக்கவசம் வழங்க திட்டமிடப்பட்டுள்ளது. இதற்காக, முதற்கட்டமாக 6 லட்சம் முகக்கவசங்கள் கோவை வந்தடைந்தன. இதில், 2.85 லட்சம் முகக்கவசம் போதிய தரமில்லை என்று கூறி திருப்பி சம்பந்தப்பட்ட நிறுவனத்திற்கு அனுப்பி வைக்கப்பட்டு உள்ளது என்பது குறிப்பிடத்தக்கது.

இதுகுறித்து, மாவட்ட நிர்வாக அதிகாரிகள் கூறுகையில், "குறைந்தது, 44 லட்சம் முககவசங்கள் வந்தால் தான் ரேசன் கடைகளில் முககவசங்கள் வழங்குவதில் சிக்கல் ஏற்படாது. தற்போது, கோவை வந்த 6 லட்சம் முககவசங்களில் 2.85 லட்சம் முககவசங்கள் தரமற்றவை என அதிகாரிகள் திருப்பி அனுப்பியுள்ளனர்," என்றார்.