திருப்பூர்: கொரோனா வைரஸ் பரவலை தடுக்க இரவு பகலாக உழைத்து வரும் தூய்மை பணியாளர்களை போற்றும் விதமாக பல்லடத்தில் தூய்மை பணியாளரின் பாதங்களை கழுவி, பொட்டு வைத்து மலர் தூவி வணங்கிய சம்பவம் நெகிழ்ச்சியை ஏற்படுத்தியுள்ளது.
திருப்பூர்: கொரோனா வைரஸ் பரவலை தடுக்க இரவு பகலாக உழைத்து வரும் தூய்மை பணியாளர்களை போற்றும் விதமாக பல்லடத்தில் தூய்மை பணியாளரின் பாதங்களை கழுவி, பொட்டு வைத்து மலர் தூவி வணங்கிய சம்பவம் நெகிழ்ச்சியை ஏற்படுத்தியுள்ளது.
உலகை அச்சுறுத்தி வரும் கொரோனா வைரஸால் நாடே முடங்கியுள்ள நிலையில், இரவு பகலாக நாட்டு மக்களை பாதுகாக்க காவல்துறை, மருத்துவர்கள், அரசு அதிகாரிகள் மற்றும் தூய்மை பணியாளர்கள் உழைத்து வருகின்றனர்.
இந்த நிலையில், அவர்களின் பணியை போற்றும் விதமாக திருப்பூர் மாவட்டம் பல்லடம் கணபதி நகரைச் சேர்ந்தவர் புஷ்பா மற்றும் அவரது மகள் அம்மு இருவரும் தங்களது வீட்டின் அருகே தூய்மை பணியில் ஈடுபட்டிருந்த தூய்மை பணியாளர் வசந்தா என்பவரது பாதங்களை கழுவி, பொட்டு வைத்து மலர் தூவி வணங்கினர். மேலும், அவர்கள் கடவுளாக நினைக்கும் குருஜி ஸ்ரீநாத் ரவிசங்கர் அவர்களின் உருவப் படத்திற்கு போடப்பட்டிருந்த மலர்மாலையை அவருக்கு அணிவித்து மரியாதை செய்தனர்.
மேலும், பண மாலையை அந்த தூய்மைப் பணியாளருக்கு அணிவித்தனர். தூய்மை பணியாளர்களும் காவலர்களும் கடவுளுக்கு நிகரானவர்கள் என்பதை உணர்த்திய அவர்கள், அந்த தூய்மை பணியாளர் வசந்தாவிற்கு சேலை ஒன்றையும் வழங்கினர்.
தூய்மை பணியாளர்களை கடவுளாக நினைத்து புஷ்பா மற்றும் அம்மு பாதங்களை கழுவி பூஜை செய்யும் இந்த நெகிழ்ச்சியான காணொளி சமூக வலைத்தளங்களிலும் வைரலாகி பரவி அனைவரிடமும் பாராட்டுகளை பெற்று வருகிறது. ஊரையே தூய்மையாக்கும் தூய்மை காவலர்களை ஊக்கப்படுத்தும் வகையில் அமைந்துள்ள இந்த வீடியோ காண்போரை நெகிழ்ச்சியடைய செய்துள்ளது.