திருப்பூரில் குறைந்த விலையில் காய்கறிகளை வீடுகளுக்கு கொண்டு செல்லும் திட்டம் - மாவட்ட ஆட்சியர் தொடங்கி வைத்தார்

திருப்பூர்: திருப்பூர் மாவட்டத்தில் காய்கறிகள் அடங்கிய தொகுப்பை குறைந்த விலையில் வீடுகளுக்கு கொண்டு செல்லும் திட்டத்தை மாவட்ட ஆட்சியர் விஜயகார்த்திகேயன் தொடங்கி வைத்தார். 



கொரோனா வைரஸ் பரவலை தடுக்கும் வகையில் நாடு முழுவதும் ஊரடங்கு உத்தரவு பிறப்பிக்கப்பட்டுள்ள சூழ்நிலையில் திருப்பூர் மாவட்டத்தில் சந்தைகளில் அதிகம் கூட்டம் கூடாதவாறு காய்கறிகள் அடங்கிய தொகுப்பை குறைந்த விலையில் வீடுகளுக்கு கொண்டு செல்லும் திட்டத்தை இன்று திருப்பூர் பழைய பேருந்து நிலைய தற்காலிக சந்தையில் மாவட்ட ஆட்சியர் விஜயகார்த்திகேயன் துவங்கி வைத்தார்.

பின்னர் செய்தியாளர்களிடம் பேசிய அவர், திருப்பூரில் வீட்டு கண்காணிப்பில் 1346 பேர் உள்ளதாகவும், திருப்பூர் அரசு மருத்துவமனையில் கொரோனா சிகிச்சை பிரிவில் இரண்டு பேர் அனுமதிக்கப்பட்டு கண்காணிக்கப்பட்டு வருகின்றனர் எனவும் சந்தைகளில் கூட்டத்தை குறைக்க காய்கறி தொகுப்பை குறைந்த விலையில் வீட்டுக்கே கொண்டு செல்லும் திட்டத்தை திருப்பூரில் இன்று முதல் செயல்படுத்தி இருக்கிறோம் என தெரிவித்தார்.

மேலும், ஞாயிற்றுக்கிழமை இறைச்சிக் கடைகளில் கூட்டத்தை குறைக்க பல்வேறு ஆலோசனைகளை இறைச்சிக்கடை உரிமையாளர்களுக்கு வழங்கியுள்ளதாகவும் அதை மீறும் கடைகளுக்கு சீல் வைக்கப்படும் என எச்சரிக்கை விடப்பட்டு உள்ளதாகவும் தெரிவித்தார்.