பொதுத்தேர்வு எழுதும் மாணவர்களுக்கு தேர்வு நேரம் அதிகரிப்பு - திருப்பூரில் அமைச்சர் செங்கோட்டையன் பேட்டி

திருப்பூர்: பொதுத்தேர்வு எழுதும் மாணவர்களுக்கான நேரம் இரண்டரை மணி நேரத்திலிருந்து மூன்று மணி நேரமாக உயர்த்தி வழங்கப்படுகிறது 10 மணிக்கு துவங்கி 1:15 மணி வரை நடைபெறும் 15 நிமிடம் கேள்வித்தாளை படிப்பதற்கான நேரம் ஒதுக்கப்படும் என திருப்பூரில் அமைச்சர் செங்கோட்டையன் தெரிவித்தார்.



திருப்பூரில் முதலிபாளையம் மற்றும் 15 வேலம்பாளையம் பகுதிகளில் அரசுப் பள்ளிகளில் கட்டப்பட்ட புதிய கட்டடங்களை திறந்து வைக்க வந்த அமைச்சர் செங்கோட்டையன் செய்தியாளர்களை சந்தித்தார். அப்போது பேசிய அவர், 12ம் வகுப்பு தேர்வுகள் மார்ச் 2ம் தேதி ஆரம்பித்து 21ம் தேதி வரை நடைபெறும் எனவும் தேர்வு முடிவுகள் ஏப்ரல் 24ம் தேதி வெளியிடப்படும் என்றார்.

அதேபோல, பத்தாம் வகுப்பு தேர்வுகள் மார்ச் 27ம் தேதி துவங்கி ஏப்ரல் 13ம் தேதி வரை நடைபெறும் எனவும் தேர்வு முடிவுகள் மே 4ம் தேதி வெளியிடப்படும் எனவும் பதினோராம் வகுப்பு தேர்வுகள் மார்ச் 4ம் தேதி தொடங்கி மார்ச் 26ம் தேதி வரை நடைபெறும் என்றும் தேர்வு முடிவுகள் மே 14ம் தேதி வெளியிடப்படும் என்று தெரிவித்தார்.



மேலும், இந்தாண்டு பொதுத்தேர்வு எழுதும் மாணவர்களுக்கான நேரம் இரண்டரை மணி நேரத்திலிருந்து மூன்று மணி நேரமாக உயர்த்தி வழங்கப்படுகிறது எனவும் 10 மணிக்கு துவங்கி 1:15 மணி வரை நடைபெறும் என தெரிவித்த அவர், 15 நிமிடம் கேள்வித்தாளை படிப்பதற்கான நேரம் ஒதுக்கப்படும் என்று கூறினார்.

பன்னிரண்டாம் வகுப்பு தேர்வை 8 லட்சத்து 16 ஆயிரத்து 359 பேரும், பத்தாம் வகுப்பு தேர்வை 9 லட்சத்து 45 ஆயிரத்து 6 பேரும், 11ம் வகுப்பு தேர்வை 8 லட்சத்து 26 ஆயிரத்து 119 பேரும் தேர்வு எழுத உள்ளதாக கூறிய அவர், கடந்த ஆண்டை காட்டிலும் இந்த ஆண்டு தேர்வு மையங்கள் அதிகப்படுத்தப்பட்டு 3012 தேர்வு மையங்களாக உருவாக்கப்பட்டுள்ளதாக அவர் தெரிவித்தார்.