வால்பாறையில் காவல் அதிகாரியை தரக்குறைவாக பேசி தாக்க முற்பட்ட நபர் கைது

கோவை: வால்பாறையில் காவல் துறையினரைத் தரக்குறைவாக பேசி காவல்துறை அதிகாரியை தாக்க முற்பட்ட நபர் கைது செய்யப்பட்டு கோவை மத்திய சிறையில் அடைக்கப்பட்டார்.



கோவை மாவட்டம் வால்பாறையை அடுத்த ஸ்டான்மோர் எஸ்டேட்டை சேர்ந்தவர் பிரபு. இவர் வால்பாறை புதுமார்க்கெட் பகுதியில் உள்ள வெள்ளச்சாஈமி என்பவரின் கறிக்கடையில் தகாத வார்த்தையில் பேசி தகராறு செய்துள்ளார். இதையடுத்து, இறைச்சி கடைக்காரர் வெள்ளச்சாமி வால்பாறை காவல் நிலையத்தில் பிரபு மீது புகார் அளித்தார்.

இதனை தொடர்ந்து வால்பாறை காவல்துறையினர் நேற்று பிரபுவை காவல் நிலையத்திற்கு அழைத்து வந்து விசாரணை மேற்கொண்டனர். இதனை தொடர்ந்து விசாரணைக்குப்பின் அவர் மீது 294 பி பிரிவின்படி வழக்கு பதிவு செய்தனர். இதனால் ஆத்திரமடைந்த பிரபு காவல் துறையினரைத் தரக்குறைவாக பேசி காவல்துறை அதிகாரியை தாக்க முற்பட்டதாக கூறப்படுகிறது.



இதையடுத்து அவர் மீது அரசு அதிகாரியை பணி செய்யவிடாமல் தடுத்த குற்றத்திற்காக 353 பிரிவின்படி வழக்குபதிவு செய்து வால்பாறை நீதிபதி முன் ஆஜர்படுத்தப்பட்டு கோவை மத்திய சிறையில் அடைக்கப்பட்டார். இவர் மீது ஏற்கனவே அனுமதியின்றி கள்ளச்சந்தையில் மது விற்றதாக வழக்குகள் உள்ளது குறிப்பிடத்தக்கது.