கோவை : கோவையில் கணவரை இழந்து வாழ்ந்து வந்த பெண்ணும், 5 வயது மகளும் சந்தேகத்திற்கிடமான வகையில் உயிரிழந்தது தொடர்பாக காவல்துறையினர் விசாரணை மேற்கொண்டு வருகின்றனர்.
கோவை : கோவையில் கணவரை இழந்து வாழ்ந்து வந்த பெண்ணும், 5 வயது மகளும் சந்தேகத்திற்கிடமான வகையில் உயிரிழந்தது தொடர்பாக காவல்துறையினர் விசாரணை மேற்கொண்டு வருகின்றனர்.
கோவை ஒண்டிப்புதூர் ஸ்ரீ காமாட்சி நகரில் வேதவள்ளி (41) என்பவர் தனது பெற்றோர் ராமகிருஷ்ணன், லீலாவதி மற்றும் தம்பி மாதவனுடன் கடந்த ஆறு மாதங்களாக வசித்து வந்துள்ளார். வேதவள்ளியின் கணவர் கண்ணன் அமெரிக்காவில் வேலை பார்த்து வந்தபோது இறந்துள்ளார். வேதவள்ளி தனது கணவர் இறந்ததையடுத்து கடந்த 6 மாதத்திற்கு முன், கோவையில் தனது பெற்றோர், தம்பியுடன் வந்து வசித்து வந்துள்ளார்.
இந்நிலையில், நேற்று இரவு வேதவள்ளியின் 5 வயது மகள் கார்குழலிக்கு உடல்நலம் சரியில்லை எனக்கூறி, கோவை அரசு மருத்துவமனைக்கு அழைத்து சென்றுள்ளனர். ஆனால், குழந்தை ஏற்கனவே உயிரிழந்துவிட்டதாக மருத்துவமனையில் தெரிவித்துள்ளனர்.
இதுதொடர்பாக தகவலறிந்த காவல்துறை சட்டம் ஒழுங்கு துணை ஆணையர் பாலாஜி சரவணன் மற்றும் சிங்காநல்லூர் காவல்துறையினர் சம்பவ இடத்திற்கு வந்து விசாரணை மேற்கொண்ட போது, வீடு பூட்டப்பட்டு, வீட்டில் தனியாக இருந்த வேதவள்ளி தூக்கிட்ட நிலையில் இருந்துள்ளார்.
வேதவள்ளியின் சடலத்தை கைப்பற்றிய காவல்துறையினர், பிரேத பரிசோதனைக்காக உடலை அரசு மருத்துவமனைக்கு அனுப்பி வைத்தனர். ஆனால் வேதவள்ளியின் மரணமும், குழந்தையின் மரணமும் பல்வேறு சந்தேகங்களை எழுப்புவதாக அக்கம்பக்கத்தினர் தெரிவிக்கின்றனர்.
அதேபோல, வேதவள்ளி தனது 5 வயது மகளை கொன்று விட்டு, தானும் தற்கொலை செய்துகொண்டதாகக் கூறப்பட்ட நிலையில், தற்போது போலீசார் சந்தேக மரணமாக வழக்குப்பதிவு செய்து தீவிர விசாரணை மேற்கொண்டு வருகின்றனர்.