கோவை கேட்டரி கிளப் சார்பில் பூனை கண்காட்சி : பல்வேறு இனங்களைச் சேர்ந்த பூனைகள் பங்கேற்பு

கோவை : கோவை சுங்கம் பைபாஸ் சாலையில் உள்ள ரோட்டரி கிளப் டெக்ஸ்சிட்டி ஹாலில் பூனை கண்காட்சி நடைபெற்றது. 



கோவை கேட்டரி கிளப் சார்பில் இப்பூனை கண்காட்சி நடத்தப்பட்டது. இதில், பெர்சியன் லாங் பூனைகள், பெர்சியன் சாட் பூனைகள், ஹிமாலயன் பூனைகள், பெங்கால் பூனைகள், சியாமிஸ் பூனைகள், சைபீரியன், ரஷ்யன் ப்ளூ, நாட்டு பூனை வகைகளைச் சேர்ந்த 25 பூனைகள் பங்கேற்றன. பூனைகள் பற்றிய விழிப்புணர்வு ஏற்படுத்தும் வகையிலும், பூனைகள் பற்றி பார்வையாளர்கள் அறிந்து கொள்ளும் வகையிலும், இந்நிகழ்ச்சி நடத்தப்பட்டதாக ஒருங்கிணைப்பாளர்கள் தெரிவித்தனர். மேலும், பூனை குட்டிகள், பூனைகளை எப்படி பராமரிப்பது, பூனைகளை பெருக்குவது பற்றியும் எடுத்துரைக்கப்பட்டதாக அவர்கள் தெரிவித்தனர்.



பூனை வளர்ப்பது குறித்து பல்வேறு தகவல்களை அறிய முடிந்ததாகவும், மிகவும் பயனுள்ளதாகவும் இருந்ததாக கூறிய பார்வையாளர்கள், ஒரே இடத்தில் பல விதமான வித்தியாசமான பூனைகளை பார்க்க முடிந்ததாக தெரிவித்தனர். பூனைகள் மற்றும் பூனை வளர்ப்பு குறித்த கருத்தரங்கம் நடைபெற்றது. இதில், பங்கேற்ற பூனைகளுக்கு இலவசமாக வெறி நாய்க்கடி தடுப்பூசி மற்றும் குடல்புழு நீக்கமும் செய்தனர். விதவிதமான பூனைகள் பார்வையாளர்களை வெகுவாக கவர்ந்தது.