தெலுங்குபாளையம் மக்கள் மனுநீதி நாள் முகாமில் ரூ. 4.64 லட்சம் மதிப்பிலான நலத்திட்ட உதவிகள் வழங்கல்

கோவை : தெலுங்குபாளையம் கிராமத்தில் நடைபெற்ற மனுநீதி நாள் முகாமில் 65 பயனாளிகளுக்கு ரூ. 4.64 லட்சம் மதிப்பிலான நலத்திட்ட உதவிகளை மாவட்ட ஆட்சியர் கு. ராசாமணி வழங்கினார்.



கோவை மாவட்டம் தெலுங்குபாளையம் கிராமத்தில் இராஜ ராஜேஸ்வரி கல்யாண மண்டபத்தில் இன்று மனுநீதி நாள் முகாம் மாவட்ட ஆட்சியர் கு. ராசாமணி தலைமையில் நடைபெற்றது. இம்முகாமில் 65 பயனாளிகளுக்கு ரூ.4.64 லட்சம் மதிப்பீட்டிலான நலத்திட்ட உதவிகளை வழங்கினார். அதாவது, சலவை பெட்டி, தையல் இயந்திரம் 4 பயனாளிகளுக்கு ரூ. 16,000 மதிப்பிலும், கனமழையால் பாதிக்கப்பட்டவர்களுக்கு இழப்பீட்டு தொகை 5 பயனாளிகளுக்கு ரூ. 30,000 மதிப்பிலும், மாற்றுத்திறனாளிகளுக்கான சக்கர நாற்காலி 3 பயனாளிகளுக்கு ரூ. 7,500 மதிப்பிலும், முதியோர் உதவித்தொகை 11 பயனாளிகளுக்கும், 14 பயனாளிகளுக்கு புதிய மின்னணு குடும்ப அட்டையும், வேளாண்மைத்துறையின் சார்பில் 5 பயனாளிகளுக்கு ரூ.40,000 மதிப்பிலும் வழங்கப்பட்டது.

மேலும், இலவச வீட்டுமனை பட்டா 3 பயனாளிகளுக்கும், பட்டா மாறுதல் 3 பயனாளிகளுக்கும், வருவாய் துறை சான்றுகள் 2 பயனாளிகளுக்கும், உட்பிரிவு பட்டா மாறுதல் 8 பயனாளிகளுக்கும், சமூக நலத்துறையின் சார்பில் இரண்டு பெண் குழந்தைகள் பாதுகாப்பு திட்டத்தின் கீழ் தலா ரூ. 50,000 மதிப்பிலான வைப்பு நிதிப் பத்திரங்கள் 5 பயனாளிகளுக்கு ரூ.2,50,000 மதிப்பிலும், தேசிய தோட்டக்கலை இயக்கம் காய்கறி பரப்பு அதிகரித்தல் திட்டத்தின் கீழ் வெண்டை விதைகள் ஒரு பயனாளிக்கு ரூ.20,000 மதிப்பிலும், சொட்டுநீர் பாசனம் அமைக்க ஒரு பயனாளிக்கு ரூ. 1,01,0120 மதிப்பிலும் என மொத்தம் 65 பயனாளிகளுக்கு ரூ. 4,64,512 மதிப்பிலான நலத்திட்ட உதவிகளை மாவட்ட ஆட்சியர் கு. ராசாமணி வழங்கினார்.

இம்முகாமில் வருவாய் கோட்டாட்சியர் (வடக்கு) சுரேஷ், சமூக பாதுகாப்புத் திட்ட தனித்துணை ஆட்சியர் அமுதன், உதவி இயக்குநர் நிலஅளவை தவமணி, மாவட்ட சமூக நல அலுவலர் தங்கமணி, மாவட்ட ஆதிதிராவிடர் நல அலுவலர் பிரபாகரன், மாவட்ட மாற்றுத்திறனாளிகள் நல அலுவலர் தங்கமணி, துணை இயக்குநர் தோட்டக்கலைத்துறை உமாராணி வட்டாட்சியர் (வடக்கு) மகேஷ் உள்ளிட்ட பல்வேறு அரசு உயர் அலுவலர்கள் கலந்து கொண்டனர்.