40 மி.கிராம் எடையில் உலககோப்பை மாதிரியை வடிவமைத்த தங்க நகை பட்டறை தொழிலாளி

கோவை : 40 மி.கிராம் எடையில் உலக கோப்பை மாதிரியை கோவையைச் சேர்ந்த தங்க நகை பட்டறை தொழிலாளி வடிவமைத்துள்ளார்.



கோவை வெள்ளலூர் பகுதியைச் சேர்ந்தவர் வெங்கடேசன். இவருக்கு காந்தி பார்க் அருகில் உள்ள சுந்தரம் வீதியில் தங்க பட்டறை உள்ளது. தங்க நகை பட்டறை தொழிலாளியான வெங்கடேசன், கடந்த 2009ம் ஆண்டு முதல் சிறிய அளவிலான பல்வேறு வடிவங்களை செய்து வருகிறார். 170 மி.கிராமில் துப்பாக்கி, 300 மி.கிராமில் தேர் மற்றும் தாமரை,110 மி.கிராமில் கிட்டார், 40 மி.கிராமில் காந்தி கண்ணாடி என பலவற்றை வடிவமைத்து உள்ளார். இந்த நிலையில், உலக கோப்பை இறுதி கட்டத்தை எட்டி உள்ள நிலையில் 40 மி.கிராம் அளவில் உலக கோப்பையை செய்துள்ளார்.



இது குறித்து வெங்கடேசன் கூறுகையில், “கடந்த 23 ஆண்டுகளாக தங்க நகை பட்டறை தொழில் செய்து வருகிறேன். 2009ம் ஆண்டில் இருந்து பல்வேறு வடிவமைப்புகள் செய்து வருகின்றனர். இதற்கு முன்பு 2011ம் ஆண்டு இந்தியா உலக கோப்பையை வென்ற போது 150 மி.கிராமில் உலக கோப்பையை செய்தனர். இந்த முறை 40 மி.கிராமில் செய்துள்ளேன். மேலும், கின்னஸில் இடம் பெறவே இது மாதிரி வடிவங்கள் செய்து வருகிறேன். தற்போது வடிவமைக்கப்பட்ட உலக கோப்பை மாதிரியை செய்ய 4 மணி நேரம் ஆனது, எனத் தெரிவித்தார்.